കോട്ടയം: എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനെതിരെ കോട്ടയം ജില്ലാ പൊലീസ് മേധാവിക്ക് പരാതി നല്‍കി പീപ്പിള്‍സ് ഡെമോക്രാറ്റിക് പാര്‍ട്ടി.പിഡിപി സംസ്ഥാന സെക്രട്ടറിയേറ്റംഗം എം.എസ്. നൗഷാദാണ് പരാതി നല്‍കിയത്.മതസ്പര്‍ധയുണ്ടാക്കണമെന്ന ലക്ഷ്യത്തോടെ പ്രസംഗിച്ചെന്നാണ് പരാതി.
കേരളം വൈകാതെ മുസ്ലിം ഭൂരിപക്ഷ നാടായി മാറുമെന്നാണ് വെള്ളാപ്പള്ളി നടേശന്‍ പറഞ്ഞത്.ഓണവും ക്രിസ്മസും വെട്ടിച്ചുരുക്കി അഡ്ജസ്റ്റ് ചെയ്യണമെന്ന് സമസ്ത പറഞ്ഞത് വെളളാപ്പളളി ചൂണ്ടിക്കാട്ടി.ഇവിടെ മതാധിപത്യമാണ്. 2040 ഓടെ കേരളം മുസ്ലിം ഭൂരിപക്ഷ സംസ്ഥാനമാകുമെന്ന് വി.എസ്.അച്യുതാനന്ദന്‍ മുന്‍പു പറഞ്ഞു. എന്നാല്‍ അതുവരെ എത്തേണ്ടി വരുമെന്നു തോന്നുന്നില്ല. നിയോജക മണ്ഡലം നോക്കിയപ്പോള്‍ ആലപ്പുഴയില്‍ രണ്ട് സീറ്റ് കുറഞ്ഞു. എന്നാല്‍, മലപ്പുറത്തു നാലു സീറ്റ് കയറി. നമ്മള്‍ ആദര്‍ശം പറഞ്ഞ് വെള്ളത്തിലാകുന്ന രീതിയിലാണ് പോകുന്നത്.’ വെള്ളാപ്പള്ളി പറഞ്ഞു.
നസ്രാണി നമുക്ക് വെല്ലുവിളിയല്ല. അവരുടെ പേര് വോട്ടര്‍പട്ടികയിലുണ്ടെങ്കിലും ആളുകള്‍ അമേരിക്കയിലും സ്വിറ്റ്‌സര്‍ലന്‍ഡിലുമാണ്. മലപ്പുറത്ത് താനൊരു സത്യം പറഞ്ഞുപോയി. തീവ്രവാദികളും ഇടത് വലതുപക്ഷ ആളുകളും കാന്തപുരം മുതല്‍ കുഞ്ഞാലിക്കുട്ടി വരെയും തന്നെ ആക്രമിച്ചുവെന്നും വെളളാപ്പളളി ചൂണ്ടിക്കാട്ടി.
കേരളം ആരു ഭരിക്കണമെന്ന് തീരുമാനിക്കാനുള്ള ശക്തി ഈഴവനുണ്ട്. കേരള കോണ്‍ഗ്രസിന്റെ അടിത്തറ ക്രിസ്ത്യാനികളാണ്.ആര്‍ ശങ്കറിനെ നശിപ്പിക്കാനാണ് കേരള കോണ്‍ഗ്രസെന്ന കോളറ ഉണ്ടാക്കിയത്. പി.ജെ.ജോസഫ് പൊതുവിദ്യാഭ്യാസത്തിന്റെ അന്തകനായി. മലബാറില്‍ 18 സീറ്റുള്ളവര്‍ക്കു തിരുക്കൊച്ചിയില്‍ നാലു സീറ്റ് കൂടി വേണം. അവര്‍ അധികാരത്തിലെത്തി മുഖ്യമന്ത്രിയാകാനാണ് ശ്രമമെന്നും വെള്ളാപ്പള്ളി പറഞ്ഞു.
