ന്യൂഡല്ഹി: പൊതുആവശ്യങ്ങള്ക്കായി ഭൂമി ഏറ്റെടുക്കുമ്പോള് നഷ്ടപരിഹാരത്തിനു പുറമെ പുനരധിവാസവും വാഗ്ദാനം ചെയ്യേണ്ടെന്ന് സര്ക്കാരുകളോട് സുപ്രീം കോടതി. കുടിയിറക്കുന്നയാളെ പുനരധിവസിപ്പിക്കേണ്ട ഉത്തരവാദിത്വം സര്ക്കാരുകള്ക്കില്ലെന്നും കോടതി ചൂണ്ടിക്കാട്ടി. മനുഷ്യത്വപരമായി അധിക ആനുകൂല്യങ്ങള് അനുവദിക്കാം. മറ്റു മാര്ഗമില്ലാത്ത അഗതികള്ക്ക് സാധാരണഗതിയില് താമസ സൗകര്യം ഉറപ്പാക്കുന്നതില് തെറ്റില്ലെന്നും കോടതി അഭിപ്രായപ്പെട്ടു. ഏറ്റെടുക്കുന്ന ഭൂമിയെമാത്രം ആശ്രയിച്ചു കഴിയുന്നവര്ക്കു മാത്രമാണ് സര്ക്കാര് പുനരധിവാസം ഉറപ്പുവരുത്തേണ്ടത്. നഷ്ടപരിഹാരത്തിനു പുറമേയുള്ള അനുകൂല്യങ്ങളുടെ കാര്യത്തില് തുല്യതയും നീതിയും ഉറപ്പാക്കാനുള്ള മാനുഷിക പരിഗണന മാത്രമാണ് വേണ്ടതെന്നും ജഡ്ജിമാരായ ജെ.ബി പര്ദ്ദിവാല, ആര് മഹാദേവന് എന്നിവര് ഉള്പ്പെട്ട ബെഞ്ച് വ്യക്തമാക്കി . അല്ലാതെയുള്ള ആനുകൂല്യങ്ങള് വാഗ്ദാനം ചെയ്യുന്നത് കൂടുതല് കേസുകള്ക്ക് വഴി തുറക്കുമെന്നും പ്രശ്നം സങ്കീര്ണ്ണമാക്കുമെന്നും കോടതി പറഞ്ഞു.
