കൊച്ചി: പ്രതിസന്ധിഘട്ടത്തില്‍ എല്ലാവരും ചെയ്യേണ്ടതാണ് താന്‍ ചെയ്തതെന്നും ഏത് രാഷ്‌ട്രീയപാര്‍ട്ടിയില്‍ ആയാലും മികച്ച ഭാരതത്തെ നിര്‍മിക്കാന്‍ ബാധ്യസ്ഥരാണെന്നും ഡോ. ശശി തരൂര്‍ എംപി. മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. കേന്ദ്രസര്‍ക്കാരിനെയും സൈന്യത്തെയും പിന്തുണച്ചതിന്റെ പേരില്‍ എനിക്കെതിരെ വിമര്‍ശനം ഉണ്ടായി. ആദ്യം രാജ്യം പിന്നെ പാര്‍ട്ടിയെന്ന് നിലപാടാണെന്ന് അദ്ദേഹം ആവര്‍ത്തിച്ചു.
ദേശീയസുരക്ഷയുടെ കാര്യത്തില്‍ ചിലപ്പോള്‍ മറ്റ് പാര്‍ട്ടികളുമായും സഹകരിക്കേണ്ടി വരും. ഇത് സ്വന്തം പാര്‍ട്ടിയോടുള്ള വിധേയത്വമില്ലായ്‌മയായി വ്യാഖ്യാനിക്കപ്പെട്ടേക്കാം. തനിക്ക് എപ്പോഴും രാജ്യം തന്നെയാണ് പ്രധാനമെന്ന് അദ്ദേഹം പറഞ്ഞു. മെച്ചപ്പെട്ട ഭാരതം സൃഷ്ടിക്കലാണ് എല്ലാ രാഷ്‌ട്രീയ പാര്‍ട്ടികളുടെയും ലക്ഷ്യം. താന്‍ ചെയ്തത് രാജ്യത്തിനു വേണ്ടിയുള്ള ശരിയായ കാര്യമാണെന്നും എല്ലാ ഭാരതീയര്‍ക്കും വേണ്ടിയാണ് താന്‍ സംസാരിച്ചതെന്നും ശശി തരൂര്‍ പറഞ്ഞു.
അടിയന്തരാവസ്ഥ ലേഖനത്തില്‍ ചില കാര്യങ്ങള്‍ സംഭവിച്ചതിനെ കുറിച്ച് മാത്രമേ എഴുതിയിട്ടുള്ളൂ. ഇത് ഞാന്‍ നേരത്തെ എഴുതിയതുമാണ്. 1997ല്‍ എഴുതിയ ‘ഇന്ത്യ അര്‍ദ്ധരാത്രി മുതല്‍ അരനൂറ്റാണ്ട്’ പുസ്തകത്തിലെ കാര്യങ്ങളാണ് വീണ്ടും പറഞ്ഞിട്ടുള്ളത്. തന്നെ വായിക്കാത്തവരാണ് ഇങ്ങനെയുള്ള വിഷയങ്ങളുണ്ടാക്കിയത്. ഗാന്ധികുടുംബത്തെ കുറിച്ച് ഒന്നും പറഞ്ഞിട്ടില്ല. അന്ന് നടന്ന സംഭവങ്ങളെക്കുറിച്ചാണ് പറഞ്ഞിട്ടുള്ളത്. തരൂര്‍ വ്യക്തമാക്കി.
ഇതിനിടയില്‍ എറണാകുളം ഡിസിസി ഇന്നലെ സംഘടിപ്പിച്ച പരിപാടിയിലേക്ക് അദ്ദേഹം കൊച്ചിയിലുണ്ടായിട്ടും ക്ഷണിച്ചില്ല. ദേശീയ പ്രശ്‌നങ്ങളിലുള്ള തരൂരിന്റെ ശക്തമായ നിലപാടാണ് കോണ്‍ഗ്രസിന്റെ ഈ തീരുമാനത്തിന് പിന്നിലെന്നാണ് സൂചന.
