നമ്മുടെ അടുക്കളയും സ്ളാബുമെല്ലാം വൃത്തിയാക്കുന്നത് പോലെ തന്നെ പ്രധാനമാണ് ഫ്രിഡ്ജ് വൃത്തിയാക്കലും. വൃത്തിയുള്ള ഫ്രിഡ്ജ് എന്നാൽ നിങ്ങളുടെ കുടുംബത്തിന് ശുദ്ധവും പുതിയതുമായ ഭക്ഷണം ലഭിക്കും എന്നാണ് അർത്ഥമാക്കുന്നത്.
ഫ്രിഡ്ജിൽ ദിവസങ്ങളായി സൂക്ഷിച്ച പഴങ്ങളും പച്ചക്കറികളും അണുക്കൾ പെരുകാൻ കാരണമാകും . അത് കൂടാതെ ബാക്കി വന്ന കറികൾ കുറെ നാളുകളായി ഫ്രിഡ്ജിൽ സൂക്ഷിച്ചു വച്ചാൽ ഫ്രിഡ്ജിൽ അണുക്കൾക്ക് വേഗത്തിൽ പെരുകാൻ കഴിയും.ഫ്രിഡ്ജ് ശരിയായ രീതിയിൽ വൃത്തിയാക്കാനും സഹായിക്കുന്ന ചില എളുപ്പ മാർഗ്ഗങ്ങളുണ്ട്.
ആദ്യം ഫ്രിഡ്ജ് സ്വിച്ച് ഓഫ് ചെയ്ത് പ്ലഗ് നീക്കം ചെയ്യുക. ഇതിനുശേഷം, ഫ്രിഡ്ജിലെ സാധനങ്ങൾ നീക്കം ചെയ്യുക. മോശമായതോ കാലഹരണപ്പെട്ടതോ ആയ ഭക്ഷണം വേസ്റ്റ് ബിന്നിൽ കളയുക.ഒരു പ്ലാസ്റ്റിക് പാത്രത്തിൽ ചെറുചൂടുള്ള വെള്ളം ഒഴിച്ച് അതിൽ അല്പം ബേക്കിംഗ് സോഡ ചേർത്ത് പേസ്റ്റ് ഉണ്ടാക്കുക. പാത്രം കഴുകുന്ന സ്പോഞ്ചിന്റെ സഹായത്തോടെ, റഫ്രിജറേറ്ററിനുള്ളിലെ എല്ലാ ഭാഗങ്ങളും, റാക്കുകളും ബോക്സുകളും ഈ പേസ്റ്റ് ഉപയോഗിച്ച് നന്നായി വൃത്തിയാക്കുക.
എന്നിട്ടും മാറാത്ത കറകൾ ഉണ്ടെങ്കിൽ ആ ഭാഗത്ത് കുറച്ച് വിനാഗിരി പുരട്ടി ഒരു സ്പോഞ്ച് ഉപയോഗിച്ച് വൃത്തിയാക്കുക. ബേക്കിംഗ് സോഡയും വിനാഗിരിയും ചേർത്ത് പേസ്റ്റ് ഉണ്ടാക്കി വാതിലും റഫ്രിജറേറ്ററിന്റെ മറ്റ് ഭാഗങ്ങളും വൃത്തിയാക്കാം. റഫ്രിജറേറ്ററിൽ നിന്ന് ദുർഗന്ധം ഉണ്ടെങ്കിൽ, ഈ ദുർഗന്ധം കുറയ്‌ക്കാൻ, നിങ്ങൾക്ക് ഒരു പാത്രത്തിൽ ബേക്കിംഗ് സോഡ ഇട്ട് കുറച്ച് മണിക്കൂർ ഫ്രിഡ്ജിൽ വയ്‌ക്കാം. ഇത് റഫ്രിജറേറ്ററിനുള്ളിലെ ദുർഗന്ധം ഇല്ലാതാക്കും.
