മുംബൈ: ഇന്ത്യയിലെ ഏറ്റവും കൂടുതല്‍ ശമ്പളമുള്ള ബാങ്കര്‍ എച്ച് ഡിഎഫ് സി ബാങ്കിന്റെ എംഡിയായ ശശിധര്‍ ജഗദീശന്‍. ഇദ്ദേഹത്തിന്റെ വാര്‍ഷിക ശമ്പളം 12.08 കോടി രൂപയാണ്. ഈ വര്‍ഷം ഇദ്ദേഹത്തിന്റെ ശമ്പളം 12 ശതമാനം വര്‍ധിപ്പിച്ചതോടെയാണ് 12.08 കോടി രൂപയാക്കിയത്.
എച്ച് ഡി എഫ് സി ബാങ്ക് വീണ്ടും ലാഭക്കുതിപ്പിലേക്ക് ഉയര്‍ന്നതോടെയാണ് എംഡി ശശിധര്‍ ജഗദീശന്റെ വാര്‍ഷിക ശമ്പളത്തില്‍ ബാങ്ക് വര്‍ധന വരുത്തിയത്. ഇതിന് പുറമെ അദ്ദേഹത്തിന് 2.12 ലക്ഷം ഓഹരികള്‍ ദീര്‍ഘകാല ഇന്‍സെന്‍റീവായി നല്‍കും. ഇപ്പോള്‍ ഒരു എച്ച് ഡിഎഫ് സി ഓഹരിയുടെ വില 1957 രൂപയാണ്. ഓഹരികള്‍ സ്വന്തമാക്കുക വഴി അദ്ദേഹത്തിന് 42.4 കോടിയാണ് ലഭിക്കുക.
ശശിധര്‍ ജഗദീശന്റെ അടിസ്ഥാന ശമ്പളം 3.09 കോടിയും പെര്‍ഫോമന്‍സ് ബോണസ് 4.67 കോടി രൂപയും അലവന്‍സുകളും മറ്റുമായി 3.46 കോടി രൂപയുമാണ് ബാങ്ക് നല്‍കുന്നത്. 2023ല്‍ ആണ് എച്ച് ഡിഎഫ് സി ബാങ്കിന്റെ എംഡി-സിഇഒ പദവിയില്‍ ശശിധര്‍ ജഗദീശന്‍ എത്തിയത്. 2026 ഒക്ടോബര്‍ 26 വരെ അദ്ദേഹം തുടരും.
ശമ്പളത്തില്‍ തൊട്ടുപിന്നില്‍ നില്‍ക്കുന്നത് ആക്സിസ് ബാങ്കിന്റെ അമിതാഭ് ചൗധരിയാണ്. 9.11 കോടി രൂപയാണ് അദ്ദേഹത്തിന്റെ വാര്‍ഷിക ശമ്പളം. ഇദ്ദേഹത്തിന് ആക്സിസ് ബാങ്കിന്റെ 2.59 ലക്ഷം ഓഹരി എംപ്ലോയീസ് സ്റ്റോക്ക് ഓപ്ഷന്‍ ആയി നല്‍കിയിട്ടുണ്ട്. ഇത് 30 കോടി രൂപ വരും.
.
