സിപിഎം നിയന്ത്രണത്തിലുള്ള സ്‌കൂളില്‍ ഷോക്കേറ്റു മരിച്ച എട്ടാം ക്ലാസുകാരന്‍ മിഥുന്‍ തേവലക്കരയുടെ തീരാനോവായി മാറി. തേവലക്കരബോയ്‌സ് ഹൈസ്‌കൂളില്‍ പഠനത്തിനെത്തിയിട്ട് ഒരു മാസം മാത്രമേ ആയുള്ളു. കിഴക്കേകല്ലട വലിയവിളന്തറ ക്ഷേത്രത്തിന് അടുത്താണ് മിഥുന്റെ വീട്. പട്ടുകടവ് സ്‌കൂളില്‍ നിന്ന് തേവലക്കര ബോയ്‌സ് ഹൈസ്‌കൂളിലേക്ക് ഈ അധ്യയനവര്‍ഷമാണ് മാറിയത്. ഹൈസ്‌കൂള്‍ പ്രവേശനത്തിന്റെ ഭാഗമായിട്ടായിരുന്നു മാറ്റം. സ്‌കൂളില്‍ കളിക്കുന്നതിനിടെ, സൈക്കിള്‍ ഷെഡിനു മുകളില്‍ വീണ ചെരിപ്പ് എടുക്കുമ്പോഴാണ് മിഥുന്‍ ഷോക്കേറ്റ് മരിച്ചത്. ഈ ഷെഡ്ഡിനു മുകളിലൂടെയാണ് ഹൈടെന്‍ഷന്‍ വൈദ്യുതി ലൈന്‍ പോകുന്നത്.
കുവൈറ്റിലാണ് മിഥുന്റെ അമ്മ സുജ ജോലി ചെയ്യുന്നത്. അച്ഛന്‍ മനുവിന് കൂലിപ്പണിയാണ്. സാമ്പത്തികമായി താഴേത്തട്ടിലുള്ള കുടുംബം. പുതിയ വീട് നിര്‍മിക്കാന്‍ ലൈഫ് പദ്ധതിയില്‍ പേര് ചേര്‍ത്തിട്ടുണ്ട്. ഇതിന്റെ അനുമതി ലഭിച്ചിട്ടില്ല.
മകനെ നഷ്ടപ്പെട്ട വേദനയില്‍ പൊട്ടിക്കരഞ്ഞ മനുവിനെ ആശ്വസിപ്പിക്കാനാകാതെ ബന്ധുക്കളും സുഹൃത്തുക്കളും വിഷമിച്ചു. സാധാരണ സ്‌കൂള്‍ ബസിലാണ് മിഥുന്‍ സ്‌കൂളിലേക്ക് പോകുന്നത്. എന്നാല്‍ ഇന്നലെ മനുവാണ് മിഥുനെ സ്‌കൂട്ടറില്‍ സ്‌കൂളിലെ ത്തിച്ചത്.
അമ്മ സുജ കുവൈറ്റില്‍ വീട്ടുജോലിക്ക് പോയിട്ട് മൂന്നു മാസമെ ആയുള്ളൂ. സുജ രാവിലെ ഫോണില്‍ വിളിച്ച് മനുവിനോടും മിഥുനോടും സംസാരിച്ചിരുന്നു. അതിനുശേഷമാണ് സ്‌കൂളിലേക്ക് പോയത്.
മനുഷ്യാവകാശ കമ്മിഷന്‍ കേസെടുത്തു
വിദ്യാര്‍ത്ഥി സ്‌കൂളില്‍ ഷോക്കേറ്റ് മരിച്ച സംഭവത്തില്‍ മനുഷ്യാവകാശ കമ്മിഷന്‍ സ്വമേധയാ കേസെടുത്തു. പൊതുവിദ്യാഭ്യാസ ഡയറക്ടറും ജില്ലാ പോലീസ് മേധാവിയും (കൊല്ലം റൂറല്‍) അടിയന്തരമായി അന്വേഷണം നടത്തി 14 ദിവസത്തിനകം റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ അംഗം വി. ഗീത ആവശ്യപ്പെട്ടു.
വിദ്യാഭ്യാസമന്ത്രി അന്വേഷണത്തിന് നിര്‍ദേശം നല്‍കി
സംഭവത്തില്‍ അടിയന്തിരമായി അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ പൊതു വിദ്യാഭ്യാസ ഡയറക്ടര്‍ക്ക് വിദ്യാഭ്യാസമന്ത്രി വി. ശിവന്‍കുട്ടി നിര്‍ദ്ദേശം നല്‍കി. കൂടാതെ, കൊല്ലം ജില്ലയിലെ ഉന്നതവിദ്യാഭ്യാസ ഓഫീസര്‍മാരോട് ആവശ്യമായ ക്രമീകരണങ്ങള്‍ ഏര്‍പ്പെടുത്താനും നിര്‍ദ്ദേശിച്ചു.
സംഭവത്തില്‍ പ്രതിഷേധിച്ച് ബിജെപി
ഈസ്റ്റ് ജില്ലാ പ്രസിഡന്റ് രാജിപ്രസാദിന്റെ നേതൃത്വത്തില്‍ സ്‌കൂളിലേക്ക് പ്രതിഷേധ മാര്‍ച്ച് നടത്തി. ഏറെനേരം റോഡ് ഉപരോധിച്ച പ്രവര്‍ത്തകരെ പോലീസ് പിന്നീട് അറസ്റ്റ് ചെയ്തു നീക്കി. ജന. സെക്രട്ടറിമാരായ ആലഞ്ചേരി ജയചന്ദ്രന്‍, എ.ആര്‍. അരുണ്‍, മണ്ഡലം പ്രസിഡന്റ്് സച്ചു, യുവമോര്‍ച്ച നേതാക്കളായ അഖില്‍ ശാസ്താംകോട്ട, മഹേഷ് മണികണ്ഠന്‍, ഏരിയ ജനറല്‍ സെക്രട്ടറി വേണു തുടങ്ങിയവര്‍ നേതൃത്വം നല്‍കി.
