ന്യൂദല്ഹി: കീം പ്രവേശന പരീക്ഷാഫലവുമായി ബന്ധപ്പെട്ട ഹര്ജികള് സുപ്രീംകോടതി ഇന്ന് പരിഗണിക്കും. കീം റാങ്ക് പട്ടിക പുതുക്കണമെന്ന ഹൈക്കോടതി വിധിക്കെതിരെ അപ്പീല് നല്കുമോയെന്ന് അറിയിക്കാന് സംസ്ഥാന സര്ക്കാരിനോട് സുപ്രീംകോടതി ആവശ്യപ്പെട്ടു. അതിനനുസരിച്ച് തീരുമാനം എടുക്കാമെന്നും കോടതി വ്യക്തമാക്കി. ഇതിന് പിന്നാലെയാണ് ഹര്ജി ഇന്ന് പരിഗണിക്കുന്നതിനായി മാറ്റിയത്. ജസ്റ്റിസ് പി.എസ്. നരസിംഹ, ജസ്റ്റിസ് എ.എസ്. ചന്ദൂര്ക്കര് എന്നിവരടങ്ങിയ ബെഞ്ചാണ് ഹര്ജി പരിഗണിച്ചത്.
പട്ടികയുമായി ബന്ധപ്പെട്ട വസ്തുതകളിലെ തര്ക്കത്തില് ഇടപെടില്ലെന്ന് ബെഞ്ചിന് നേതൃത്വം നല്കിയ ജസ്റ്റിസ് പി.എസ്. നരസിംഹ അഭിപ്രായപ്പെട്ടു. എന്നാല് ഭാവിയില് ഈ പ്രതിസന്ധി ഉണ്ടാകാതിരിക്കാനുള്ള ഇടപെടല് ഉണ്ടാകുമെന്നും അദ്ദേഹം വ്യക്തമാക്കി. റാങ്ക് പട്ടിക തയാറാക്കുന്നതിന് തൊട്ട് മുമ്പ് മാര്ക്ക് ഏകീകരണ ഫോര്മുലയില് എന്തിന് മാറ്റം വരുത്തിയെന്ന് കോടതി വാക്കാല് ആരാഞ്ഞു. അതാണ് തങ്ങളെ ബുദ്ധിമുട്ടിക്കുന്നതെന്നും കോടതി ചൂണ്ടിക്കാട്ടി. രാജ്യത്ത് നടക്കുന്ന പല പ്രവേശന പരീക്ഷകളിലും മാര്ക്ക് ഏകീകരണവുമായി ബന്ധപ്പെട്ട പ്രതിസന്ധികള് ഉണ്ടെന്നും കോടതി നിരീക്ഷിച്ചു.
ഹൈക്കോടതി വിധിയുടെ അടിസ്ഥാനത്തില് തയാറാക്കിയ പുതുക്കിയ റാങ്ക് പട്ടികയില് കേരള സിലബസില് പഠിച്ച വിദ്യാര്ത്ഥികള്ക്ക് തിരിച്ചടിയാണെന്ന് ഹര്ജിക്കാര്ക്ക് വേണ്ടി ഹാജരായ മുതിര്ന്ന അഭിഭാഷകന് പ്രശാന്ത് ഭൂഷണ് ചൂണ്ടിക്കാട്ടി. തുടര്ന്നാണ് സംസ്ഥാന സര്ക്കാര് ഹൈക്കോടതി വിധിക്കെതിരെ അപ്പീല് നല്കുന്നുണ്ടോയെന്ന് കോടതി ആരാഞ്ഞത്. ഈ കേസില് ഇന്നലെ സംസ്ഥാന സര്ക്കാരിന്റെ അഭിഭാഷകര് ആരും ഹാജരായിരുന്നില്ല. തുടര്ന്നാണ് കേസ് പരിഗണിക്കുമ്പോള് കോടതി മുറിയില് ഉണ്ടായിരുന്ന സംസ്ഥാന സര്ക്കാരിന്റെ സ്റ്റാന്ഡിങ് കോണ്സല് സി.കെ. ശശിയോട് സംസ്ഥാനം അപ്പീല് ഫയല് ചെയ്യുന്നുണ്ടോ എന്ന് അറിയിക്കാന് സുപ്രീംകോടതി നിര്ദേശം നല്കിയത്.
ഹൈക്കോടതി വിധി സംസ്ഥാന സര്ക്കാര് നടപ്പാക്കിയെന്നും അതിനാല് ഇനി കോടതി ഇടപെടല് ഉണ്ടാകരുതെന്നും തടസ ഹര്ജി നല്കിയ സിബിഎസ്ഇ വിദ്യാര്ത്ഥികള്ക്ക് വേണ്ടി ഹാജരായ മുതിര്ന്ന അഭിഭാഷകന് രാജു രാമചന്ദ്രനും ആവശ്യപ്പെട്ടു.
കീം പ്രവേശനത്തിനുള്ള റാങ്ക് പട്ടിക റദ്ദാക്കിയ ഹൈക്കോടതി വിധിയും പുതിയ റാങ്ക് പട്ടികയും റദ്ദാക്കണമെന്നാണ് കേരള സിലബസ് വിദ്യാര്ത്ഥികള് നല്കിയ ഹര്ജിയിലെ ആവശ്യം. ഹൈക്കോടതി വിധി അടിയന്തരമായി സ്റ്റേ ചെയ്യണമെന്നും ഹര്ജിക്കാര് ആവശ്യപ്പെടുന്നു.
തങ്ങളുടെ വാദം കേള്ക്കാതെ തീരുമാനമെടുക്കരുതെന്ന് ആവശ്യപ്പെട്ട് സിബിഎസ്ഇ വിദ്യാര്ത്ഥികള് തടസഹര്ജിയും ഫയല് ചെയ്തിട്ടുണ്ട്. പ്രോസ്പെക്ടസില് മാറ്റം വരുത്താന് സര്ക്കാരിന് അധികാരമുണ്ടെന്ന് സ്റ്റേറ്റ് സിലബസ് വിദ്യാര്ത്ഥികളും ഈ മാറ്റം നിയമവിരുദ്ധമാണെന്ന് സിബിഎസ്ഇ വിദ്യാര്ത്ഥികളും അവകാശപ്പെടുന്നു.
