കോട്ടയം: വധശിക്ഷ വിധിക്കപ്പെട്ട് യെമനിലെ ജയിലില്‍ കഴിയുന്ന മലയാളി നഴ്‌സ് നിമിഷപ്രിയ തിരിച്ചു വരുമെന്നാണ് വിശ്വാസമെന്ന് ചാണ്ടി ഉമ്മന്‍ എംഎല്‍എ. കൂട്ടായ പരിശ്രമം വിജയം കാണുന്നു. കേരള ഗവര്‍ണര്‍ ഉള്‍പ്പെടെ എല്ലാവരും നിമിഷ പ്രിയയുടെ മോചനത്തിനായി ശ്രമിക്കുകയാണ്. ഉമ്മന്‍ചാണ്ടിയുടെ ആഗ്രഹമാണ് സഫലമാകുന്നതെന്ന് ചാണ്ടി ഉമ്മന്‍ പ്രതികരിച്ചു.
വധശിക്ഷാ വിധി നടപ്പാവാന്‍ മണിക്കൂറുകള്‍ മാത്രം ബാക്കിനില്‍ക്കേ കാന്തപുരം അബൂബേക്കര്‍ മുസ്ലിയാര്‍ ഇടപെട്ടതും വലിയ പങ്കുവഹിച്ചു. സാജന്‍ ലത്തീഫ് എന്ന വ്യവസായിയും ഇടപെട്ടു. നിമിഷ പ്രിയയുടെ മോചനത്തിനായി ദീപ ജോസഫ്, സുഭാഷ് ചന്ദ്രന്‍ തുടങ്ങിയവര്‍ വര്‍ഷങ്ങളായി പരിശ്രമിക്കുന്നു. എല്ലാവരോടും നന്ദിയുണ്ടെന്നും ചാണ്ടി ഉമ്മന്‍ പറഞ്ഞു.
വധശിക്ഷ റദ്ദാക്കാനുള്ള ശ്രമം അടുത്തഘട്ടത്തിലേക്ക് കടക്കണം. കൊല്ലപ്പെട്ട ആളുടെ കുടുംബവുമായി അടിയന്തരമായി ചര്‍ച്ച നടത്തണം.കൂടുതല്‍ വിവരങ്ങള്‍ ഇപ്പോള്‍ പറയുന്നില്ലെന്നും എം എല്‍ എ പറഞ്ഞു.
അതിനിടെ,നിമിഷ പ്രിയ വിഷയത്തില്‍ മനുഷ്യന്‍ എന്ന നിലയില്‍ ആണ് ഇടപെട്ടത് എന്ന് കാന്തപുരം എ പി അബൂബക്കര്‍ മുസ്ലിയാര്‍ പറഞ്ഞു. കൊലകുറ്റം ചെയ്തവര്‍ക്ക് മാപ്പ് നല്‍കാന്‍ കുടുംബങ്ങള്‍ക്ക് ഇസ്ലാം മത നിയമപ്രകാരം കഴിയും.ഇവിടെ ആ കുടുംബങ്ങള്‍ ആരാണെന്നോ അവരുടെ അവസ്ഥ എന്താണെന്നോ അറിയാത്ത താന്‍ വളരെ ദൂരെയുള്ള ഈ സ്ഥലത്ത് നിന്ന് യെമനിലെ ഉത്തരവാദിത്തപ്പെട്ട പണ്ഡിതന്‍മാരെ ബന്ധപ്പെടുകയും അവരോട് ഈ കാര്യങ്ങള്‍ മനസിലാക്കിക്കൊടുക്കുകയും ചെയ്തെന്നും കാന്തപുരം പറഞ്ഞു.
