പത്തനംതിട്ട: ചീഫ് സെക്രട്ടറി തലത്തില് യോഗം കൂടി ആറന്മുളയില് വയല് നികത്തിയുള്ള ഇലക്ട്രോണിക്സ് ക്ലസ്റ്റര് പദ്ധതി ഉപേക്ഷിക്കാന് തീരുമാനിച്ച ശേഷവും പദ്ധതിയുടെ നടത്തിപ്പു സാധ്യത തേടി വീണ്ടും ഐടി വകുപ്പ് രംഗത്ത്. ഇതു സംബന്ധിച്ച് ഐടി വകുപ്പ് സ്പെഷ്യല് സെക്രട്ടറി ഈ മാസം രണ്ടിന് പത്തനംതിട്ട ജില്ലാ കളക്ടര്ക്ക് കത്തുനല്കി. പദ്ധതിയുടെ നടത്തിപ്പുസാധ്യത ആരാഞ്ഞാണ് കളക്ടര്ക്കു കത്തു നല്കിയത്.
ഭൂമിയുടെ അളവ്, നെല്വയല് എത്ര, തണ്ണീര് തടത്തിന്റെ അളവ്, കൃഷിഭൂമി സംബന്ധിച്ച വിവരം, കരഭൂമിയുടെ അളവ് എന്നിവ സംബന്ധിച്ച വിവരങ്ങളും ഐടി സ്പെഷ്യല് സെക്രട്ടറി ആവശ്യപ്പെട്ടിട്ടുണ്ട്. വയല് നികത്തിയുള്ള ക്ലസ്റ്റര് പദ്ധതി സര്ക്കാര് ഉപേക്ഷിച്ചിട്ടില്ലെന്നതാണ് ഇത് വ്യക്തമാക്കുന്നത്. മുഖ്യമന്ത്രിയുടെ കീഴിലുള്ള ഐടി വകുപ്പാണ് പദ്ധതിയില് പ്രത്യേക താത്പര്യം പ്രകടിപ്പിക്കുന്നത്. ഇക്കാര്യത്തില് സിപിഐയും സിപിഎമ്മും തമ്മിലുള്ള അഭിപ്രായഭിന്നത നേരത്തെ തന്നെ മറനീക്കി പുറത്തുവന്നിരുന്നു.
സര്ക്കാര് ഭാഗത്തുനിന്ന് റവന്യൂ, കൃഷി വകുപ്പുകള് മാത്രമാണ് പദ്ധതിയെ എതിര്ക്കുന്നത്. രണ്ടു വകുപ്പുകളും സിപിഐ ആണ് കൈകാര്യം ചെയ്യുന്നത്. തുടക്കം മുതല് തന്നെ പദ്ധതിക്ക് അനുകൂല നിലപാടാണ് ഐടി വകുപ്പ് സ്വീകരിച്ചത്. സംഭവം വിവാദമായതോടെ ചീഫ് സെക്രട്ടറിയുടെ നേതൃത്വത്തില് പ്രത്യേക യോഗം ചേര്ന്ന് പദ്ധതിയുമായി മുന്നോട്ടു പോകേണ്ടന്ന് തീരുമാനിക്കുകയും ചെയ്തു. എന്നാല് ഇത് റവന്യൂ, കൃഷി വകുപ്പുകളുടെ മാത്രം സമ്മര്ദ്ദത്തെ തുടര്ന്നായിരുന്നു എന്നാണ് സൂചന. ഇക്കാര്യത്തില് ഐടി വകുപ്പ് അപ്പോഴും കൃത്യമായ നിലപാട് സ്വീകരിച്ചിരുന്നില്ല. എന്നാല് മുഖ്യമന്ത്രിയുടെ പ്രത്യേക നിര്ദേശത്തെ തുടര്ന്നാണ് ഐടി വകുപ്പിന്റെ ഇപ്പോഴത്തെ നീക്കമെന്ന് അറിയുന്നു.
