ഗ്ലാസ്ഗോ: മുട്ടുകാലിനേറ്റ പരിക്കിനെ തുടര്ന്ന് കോമണ്വെല്ത്ത് ഗെയിംസിലെ പുരുഷന്മാരുടെ ഹൈജമ്പ് ഫൈനലില് നിന്ന് ഭാരത താരം തേജസ്വിന് ശങ്കര് പിന്മാറി. മത്സരത്തിനു മുന്നോടിയായുള്ള വാംഅപ്പിനിടെ ഉണ്ടായ കടുത്ത വേദനയെത്തുടര്ന്നാണ് 27കാരനായ തേജസ്വിന് തന്റെ പ്രിയപ്പെട്ട ഇനത്തില് നിന്ന് പിന്മാറാന് നിര്ബന്ധിതനായത്. വാര്ത്താ സമ്മേളനത്തില് സംസാരിക്കവെ വികാരാധീനനായ താരം കണ്ണീരണിഞ്ഞാണ് തനിക്ക് നേരിട്ട നിര്ഭാഗ്യകരമായ അവസ്ഥയെക്കുറിച്ച് വിശദീകരിച്ചത്.
മുന്പ് തന്നെ അലട്ടിയിരുന്ന ‘ടെന്ഡൊണൈറ്റിസ്’ വീണ്ടും കടുത്തതാണ് പരിക്കിന് കാരണമായതെന്ന് തേജസ്വിന് വ്യക്തമാക്കി. ആദ്യ ശ്രമത്തിനുശേഷം കടുത്ത വേദന അനുഭവപ്പെട്ടതിനെ തുടര്ന്ന് മത്സരം അവസാനിപ്പിക്കുകയായിരുന്നു. സ്വന്തം മെഡല് സ്വപ്നം തകര്ന്നതിന്റെ വേദനയിലും മൈതാനം വിട്ടുപോകാതെ സഹതാരം സര്വേശ് കുഷാരെയെ പ്രോത്സാഹിപ്പിക്കാന് തേജസ്വിന് തയ്യാറായി. മത്സരത്തിനിടെ സര്വേശിന് ആവശ്യമായ സാങ്കേതിക ഉപദേശങ്ങള് നല്കിയ തേജസ്വിന്റെ പിന്തുണ, സര്വേശ് വെള്ളി മെഡല് നേടുന്നതില് നിര്ണ്ണായക പങ്കുവഹിച്ചു. പരിക്കില് നിന്ന് വേഗത്തില് മുക്തനായി വരാനിരിക്കുന്ന ഡെക്കാത്ത്ലണ് മത്സരങ്ങളില് പങ്കെടുക്കാന് സാധിക്കുമെന്ന പ്രതീക്ഷയിലാണ് താരം.
‘365 ദിവസത്തില് പരിക്ക് കടുക്കരുത് എന്ന് നമ്മള് ആഗ്രഹിക്കുന്ന ആ ഒരു ദിവസം തന്നെ ഇത് സംഭവിച്ചു എന്നത് ഏറെ വിഷമകരമാണ്. മികച്ച ഫോമിലായിരുന്നതിനാല് മെഡല് നേടാനാകുമെന്ന് എനിക്ക് പൂര്ണ്ണ വിശ്വാസമുണ്ടായിരുന്നു എന്നും അദ്ദേഹം വാര്ത്താ സമ്മേളനത്തില് പറഞ്ഞു. 2022 ബര്മിംഗ്ഹാം കോമണ്വെല്ത്ത് ഗെയിംസില് ഹൈജമ്പില് വെങ്കലം നേടി തേജസ്വിന് ചരിത്രം കുറിച്ചിരുന്നു. ഇത്തവണത്തെ ഗെയിംസില് ഭാരതത്തിന്റെ വലിയ മെഡല് പ്രതീക്ഷകളില് ഒന്നായിരുന്നു ഈ ഡെല്ഹി സ്വദേശി.
