ധര്മശാല : ടിബറ്റന് ആത്മീയ നേതാവ് ദലൈലാമ നവതി ആഘോഷ നിറവില്. ശക്തമായ മഴയെ അവഗണിച്ച് ആയിരങ്ങളാണ് ദലൈലാമയ്ക്ക് തൊണ്ണൂറാം ജന്മദിനാശംസ നേരാന് ഇന്നലെ ധര്മശാലയിലെ ക്ഷേത്രത്തിലെത്തിയത്.
പരമ്പരാഗത വസ്ത്രവും മഞ്ഞ നിറത്തിലുള്ള കവചവും ധരിച്ച് പുഞ്ചിരിച്ചുകൊണ്ടാണ് ദലൈലാമ ക്ഷേത്രത്തിലെ പ്രാര്ത്ഥനാ ചടങ്ങുകളിലും തുടര്ന്നുള്ള ആഘോഷങ്ങളിലും പങ്കെടുത്തത്. കേന്ദ്രമന്ത്രിമാരായ കിരണ് റിജിജു, രാജീവ് രഞ്ജന് സിങ്, അരുണാചല് പ്രദേശ് മുഖ്യമന്ത്രി പേമ ഖണ്ഡു, ഹോളീവുഡ് നടന് റിച്ചാര്ഡ് ഗെരെ അടക്കം നിരവധി പ്രമുഖര് ജന്മദിനാഘോഷത്തില് പങ്കെടുത്തു.
താന് വെറുമൊരു സാധാരണ ബുദ്ധസംന്യാസിയാണ്. ജന്മദിനവുമായി ബന്ധപ്പെട്ട ആഘോഷങ്ങളില് പൊതുവെ പങ്കെടുക്കാറില്ലെങ്കിലും ഇത്തരം പരിപാടികള് പരോപകാര പ്രവര്ത്തനങ്ങളുടെ ഭാഗമാക്കാന് സഹായിക്കുന്നുണ്ടെങ്കില് അതിനെ അഭിനന്ദിക്കുന്നതായി ദലൈലാമ പറഞ്ഞു. ഈ ആഘോഷത്തെ സ്നേഹം, അനുകമ്പ, പരോപകാരം എന്നിവ ഉയര്ത്തിപ്പിടിക്കാന് സഹായിക്കുന്ന സംരംഭമാക്കി മാറ്റാന് സാധിച്ചതില് അഭിനന്ദനങ്ങള്. ഭൗതികമായ ഉന്നമനം ആവശ്യമാണെങ്കിലും നമ്മള് ചുറ്റുമുള്ളവരെ കുറിച്ച് ചിന്തിക്കുന്നവരും അവരോട് കരുണയുള്ളവരുമായിരിക്കണം, നവതി ആഘോഷ ചടങ്ങില് നല്കിയ സന്ദേശത്തില് ദലൈലാമ പറഞ്ഞു.
