തിരുവനന്തപുരം: വ്യാപകമായി തണ്ണീര്ത്തടങ്ങള് നികത്തിയുള്ള ആറന്മുള വിമാനത്താവള പദ്ധതി പൊളിഞ്ഞതോടെ അതേ ഭൂമിയില് ഐടി പാര്ക്കിന് നീക്കവുമായി രംഗത്തെത്തിയ കെജിഎസ് ഗ്രൂപ്പിന് പിന്തുണയുമായി മുഖ്യമന്ത്രിയുടെ ഐടി വകുപ്പ്. വിവാദ ഭൂമിയിലെ ഇലക്ട്രോണിക്സ് ക്ലസ്റ്റര് പദ്ധതിയുമായി സഹകരിക്കാവുന്നതാണെന്ന് ഐടി വകുപ്പിന് കീഴിലെ കെഎസ്ഐടിഐൽ ബോർഡ് വിലയിരുത്തി. വ്യവസായ വളര്ച്ചയ്ക്ക് പദ്ധതി പ്രയോജനകരമാണെന്നും സർക്കാരിൽ നിന്നും നിക്ഷേപം ആവശ്യമില്ലെന്നും ബോർഡ് വ്യക്തമാക്കി.
വിമാനത്താവള പദ്ധതിക്കായി തണ്ണീര്ത്തടങ്ങള് നികത്തിയതുള്പ്പെടെയുള്ള നിലവിലെ നിയമക്കുരുക്കുകള് മറികടക്കാന് ടിഒഎഫ്എല് എന്ന പേരില് പുതിയ കമ്പനി രൂപീകരിച്ചാണ് കെജിഎസ് ഗ്രൂപ്പ് ഐടി പദ്ധതിയുമായി രംഗത്തുവന്നിട്ടുള്ളത്. കെഎസ്ഐടിഐഎല്ലിന് 5 ശതമാനം വിയര്പ്പ് ഓഹരി നൽകാമെന്ന് ടിഒഎഫ്എല് അറിയിച്ചിട്ടുണ്ട്. ഡയറക്ടര് സ്ഥാനവും വാഗ്ദാനം ചെയ്തു. അതേസമയം വാര്ഷിക റിട്ടേണും സാമ്പത്തിക വിവരങ്ങളും ടിഒഎഫ്എല് നൽകിയിട്ടില്ല ഇതിന്റെ കാരണം ചര്ച്ച ചെയ്ത് പരിഹരിക്കണമെന്നും കെഎസ്ഐടിഐൽ ബോര്ഡ് ശുപാര്ശ ചെയ്തു.
7000 കോടി രൂപയുടെ നിക്ഷേപവും 10,000 പേര്ക്ക് തൊഴിലുമെന്നാണ് കെജിഎസ് ഗ്രൂപ്പിന്റെ വാഗ്ദാനം. ആറന്മുള ഇലക്ട്രോണിക്സ് ക്ലസ്റ്റര് പദ്ധതി എന്നാണ് അപേക്ഷയില് പറയുന്നത്. സര്ക്കാരുമായി യോജിച്ച് പദ്ധതി നടത്താമെന്ന് അറിയിച്ച് കമ്പനി അധികൃതര് ഐടി വകുപ്പിനെ സമീപിക്കുകയായിരുന്നു. വിവാദഭൂമി ഐടി കമ്പനിക്ക് കൈമാറുന്നത് സംബന്ധിച്ച് ഐടി വകുപ്പ് കൃഷിവകുപ്പിന്റെയും റവന്യൂവകുപ്പിന്റെയും അഭിപ്രായം തേടിയിരുന്നു.
നിര്ദിഷ്ട 139.20 ഹെക്ടര് ഭൂമിയില് 16.32 ഹെക്ടര് മാത്രമാണ് കരഭൂമി. ബാക്കി തണ്ണീര്ത്തടങ്ങളും നെല്വയലുകളും പുഴകളുമാണ്. ഒരു കാരണവശാലും തണ്ണീര്ത്തടം നികത്തിയുള്ള ഐടി പാര്ക്ക് നിര്മാണം സ്ഥലത്ത് അനുവദിക്കില്ലെന്നും ഏതൊരു നിലവും ആര്ക്കും നികത്താമെന്ന നയം അനുവദിക്കാനാകില്ലെന്നുമാണ് കൃഷിവകുപ്പ് മന്ത്രി പി. പ്രസാദിന്റെ നിലപാട്. മന്ത്രിസഭാ യോഗത്തില് ഇതുസംബന്ധിച്ച് കൃഷിമന്ത്രി ശക്തമായ നിലപാടെടുത്തതായാണ് സൂചന.
കവി സുഗതകുമാരിയുടെയും ബിജെപി നേതാവ് കുമ്മനം രാജശേഖരന്റെയും നേതൃത്വത്തില് ശക്തമായ ബഹുജന സമരവും നിയമ നടപടികളും ആരംഭിച്ചതോടെയാണ് ആറന്മുള വിമാനത്താവള പദ്ധതി കെജിഎസ് ഗ്രൂപ്പിന് ഉപേക്ഷിക്കേണ്ടി വന്നത്. സമരം വിജയിക്കുമെന്നുറപ്പായതോടെ ഇടതുപക്ഷവും വിമാനത്താവളത്തിനെതിരേ രംഗത്തെത്തിയിരുന്നു. നിയമസഭാ തെരഞ്ഞെടുപ്പിലുള്പ്പെടെ വിഷയം ചര്ച്ചയാക്കുകയും 2016 ഒക്ടോബറില് സ്ഥലത്തെ പുഞ്ചപ്പാടങ്ങളില് മുഖ്യമന്ത്രി പിണറായി വിജയന് നെല്വിത്തെറിഞ്ഞ് കൃഷിയിറക്കുകയും ചെയ്തു. ഇവിടെയുള്ള 56 ഹെക്ടര് ഭൂമിയില് കൃഷിയിറക്കുമെന്നാണ് ഒന്നാം പിണറായി സര്ക്കാര് പ്രഖ്യാപിച്ചിരുന്നത്.
അന്ന് പരിപാടിയില് മുഖ്യമന്ത്രിക്കൊപ്പം കൃഷിമന്ത്രി വി.എസ്. സുനില്കുമാര്, മന്ത്രി മാത്യു ടി. തോമസ്, എംഎല്എ വീണ ജോര്ജ് എന്നിവരും പങ്കെടുത്തിരുന്നു. ഇന്ന് അതേ മുഖ്യമന്ത്രി കൈകാര്യം ചെയ്യുന്ന ഐടി വകുപ്പ് നെല്പ്പാടങ്ങളുള്പ്പെടെ നികത്തി ഐടി പാര്ക്ക് ആരംഭിക്കാന് ചുക്കാന് പിടിക്കുന്നത് ദുരൂഹമാണ്.
