ടെഹ്റാൻ ; ഇറാനിലെ ഫോർഡോ ആണവ കേന്ദ്രത്തിന് സമീപം ഭൂകമ്പം . റിക്ടർ സ്ക്കെയിലിൽ 2.5 തീവ്രത രേഖപ്പെടുത്തിയ ഭൂകമ്പം ഇന്ന് പുലർച്ചെ രണ്ടരയോടെയാണ് അനുഭവപ്പെട്ടത് .ഇറാന്റെ ആണവ കേന്ദ്രങ്ങൾക്ക് നേരെ ഇസ്രായേൽ തുടർച്ചയായ നാലാം ദിവസവും ആക്രമണം തുടരുന്നതിനിടെയാണ് ഇറാന്റെ ഫോർഡോ ആണവ കേന്ദ്രത്തിന് സമീപവും സിസ്റ്റാൻ, ബലൂചെസ്ഥാൻ പ്രവിശ്യകളിലും ഭൂകമ്പങ്ങൾ ഉണ്ടായത്.
നേരത്തെ പാകിസ്ഥാനിൽ ഇന്ത്യയുടെ ഓപ്പറേഷൻ സിന്ദൂരിനിന് ശേഷവും ഇത്തരം ഭൂകമ്പങ്ങൾ അനുഭവപ്പെട്ടിരുന്നു. കോം നഗരത്തിനടുത്തുള്ള ഫോർഡോ കേന്ദ്രത്തിൽ ഭൂകമ്പവും സമീപത്തുള്ള സ്ഫോടനങ്ങളും ഒരേ സമയം അനുഭവപ്പെട്ടതായി റിപ്പോർട്ടുണ്ട്. പാകിസ്ഥാൻ അതിർത്തിയോട് ചേർന്നുള്ള സിസ്റ്റാൻ, ബലൂചെസ്ഥാൻ പ്രവിശ്യകളിലും 4.3 തീവ്രത രേഖപ്പെടുത്തിയ ഭൂകമ്പം രേഖപ്പെടുത്തി.
ഇറാനിലെ മൂന്ന് പ്രധാന ആണവ കേന്ദ്രങ്ങളായ നതാൻസ്, ഇസ്ഫഹാൻ, ഫോർഡോ എന്നിവിടങ്ങളിലും ഇസ്രായേൽ ആക്രമണം നടത്തിയിരുന്നു. കഴിഞ്ഞ ആഴ്ച ആദ്യ ആക്രമണം നതാൻസ് സമ്പുഷ്ടീകരണ കേന്ദ്രത്തിലും ഇസ്ഫഹാനിലെ യുറേനിയം പരിവർത്തന കേന്ദ്രത്തിലും ആയിരുന്നു. ഫോർഡോയിലും പിന്നീട് ആക്രമണമുണ്ടായി.
നതാൻസിലെ പവർ സ്റ്റേഷൻ ഉൾപ്പെടെയുള്ള ഭാഗങ്ങളിൽ ഗണ്യമായ നാശനഷ്ടങ്ങൾ ഉണ്ടായതായി സമീപകാല ഉപഗ്രഹ ചിത്രങ്ങൾ വെളിപ്പെടുത്തി . നേരത്തെ കിരാന കുന്നുകൾക്ക് സമീപമുള്ള ആണവ കേന്ദ്രങ്ങൾക്കടുത്ത് ഓപ്പറേഷൻ സിന്ദൂരിനിടെ ഇന്ത്യ സൈനിക ആക്രമണങ്ങൾ നടത്തിയതിനു ശേഷമാണ് പാകിസ്ഥാനിൽ ഇത്തരം ഭൂകമ്പങ്ങൾ അനുഭപ്പെട്ടതെന്നാണ് വിദഗ്ധർ പറയുന്നത് .
