ആരോഗ്യ നില വഷളായി, ജാമ്യാപേക്ഷയുമായി നടി ലീന മരിയ പോള്‍, ഇടപെടാതെ സുപ്രീം കോടതി
ന്യൂദല്‍ഹി: സാമ്പത്തിക തട്ടിപ്പ് കേസില്‍ നടിയും മോഡലുമായ ലീന മരിയ പോളിന്റെ ജാമ്യാപേക്ഷ സുപ്രീം കോടതി തള്ളി. സുകേഷ് ചന്ദ്രശേഖറിന്റെ 200 കോടി രൂപയുടെ അഴിമതിയുമായി ബന്ധപ്പെട്ട കേസില്‍ കൂട്ടുപ്രതിയായ ലീന ആരോഗ്യപരമായ കാരണങ്ങളാലാണ് ജാമ്യം തേടിയത്. ക്ഷയരോഗം ബാധിച്ച് മൂന്നര വര്‍ഷത്തിലേറെയായി ജയിലില്‍ കഴിയുകയാണ് താനെന്ന് നടി പറയുന്നു. എന്നാല്‍ ജാമ്യാപേക്ഷ ഡല്‍ഹി ഹൈക്കോടതിയുടെ പരിഗണനയിലാണെന്നും ഈ ഘട്ടത്തില്‍ ഇടപെടുന്നില്ലെന്നും സുപ്രീം കോടതി പറഞ്ഞു. ഹൈക്കോടതി വിധിക്കു ശേഷം ആവശ്യമെങ്കില്‍ വീണ്ടും സമീപിക്കാമെന്ന് സുപ്രീംകോടതി നിര്‍ദ്ദേശിച്ചു.
ഫോര്‍ട്ടിസ് ഹെല്‍ത്ത് കെയറിന്റെ മുന്‍ പ്രൊമോട്ടറായ ശിവിന്ദര്‍ സിങ്ങിന്റെ ഭാര്യ അദിതി സിങ്ങില്‍ നിന്ന് സുകേഷ് ചന്ദ്രശേഖറും സംഘവും 200 കോടി രൂപ തട്ടിയെടുത്തുവെന്ന ആരോപണത്തിലാണ് ലീന മരിയ പോള്‍ അറസ്റ്റിലായത്. മോഹന്‍ലാല്‍ നായകനായ റെഡ് ചില്ലീസ് അടക്കമുള്ള മലയാള ചിത്രങ്ങളിലൂടെ ലീന പ്രശസ്തയാണ്.
