നിലമ്പൂര്‍: മലയോര ജനതയ്‌ക്ക് ആശ്വാസം നല്‍കുന്ന 2023 ലെ കേന്ദ്രത്തിന്റെ വനഭേദഗതി നിയമം കേരളം പരിഗണിക്കാത്തതാണ് ആ മേഖലയിലെ പ്രശ്‌നങ്ങള്‍ക്ക് കാരണമെന്ന് ബിജെപി മുന്‍ സംസ്ഥാന അധ്യക്ഷന്‍ കെ. സുരേന്ദ്രന്‍. നിലമ്പൂരിലെ വനം വകുപ്പ് ആസ്ഥാനത്തിന് മുന്നില്‍ എന്‍ഡിഎ സ്ഥാനാര്‍ത്ഥി അഡ്വ. മോഹന്‍ ജോര്‍ജ് നടത്തിയ പ്രതിഷേധ ധര്‍ണ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കുടിയേറ്റ ജനതയുടെ പ്രശ്‌നങ്ങള്‍ പരിഹരിക്കാനായിരുന്നു ഈ നിയമം. നിര്‍മ്മിത ബുദ്ധിയുടെ സഹായത്താല്‍ വന്യമൃഗങ്ങള്‍ നാട്ടിലിറങ്ങുന്നത് തടയാന്‍ മറ്റു സംസ്ഥാനങ്ങള്‍ തയാറാവുമ്പോള്‍ ഇവയൊന്നും നടപ്പാക്കാന്‍ കേരള സര്‍ക്കാര്‍ മാത്രം തയാറായില്ല, അദ്ദേഹം കുറ്റപ്പെടുത്തി.
നിലമ്പൂരിലെ മലയോര ജനത നേരിടുന്ന വന്യജീവി ആക്രമണങ്ങള്‍ക്ക് ശാശ്വത പരിഹാരം കാണാന്‍ എന്‍ഡിഎ സ്ഥാനാര്‍ത്ഥി അഡ്വ. മോഹന്‍ ജോര്‍ജിനെ വിജയിപ്പിക്കേണ്ടത് മലയോര ജനതയുടെ ആവശ്യമാണെന്നും കെ.സുരേന്ദ്രന്‍ പറഞ്ഞു.
അഡ്വ. മോഹന്‍ ജോര്‍ജ്, ബിജെപി സംസ്ഥാന സമിതിയംഗം അഡ്വ. ഷോണ്‍ ജോര്‍ജ്, അഡ്വ. എസ്. സുരേഷ്, അനൂപ് ആന്റണി, മലപ്പുറം ഈസ്റ്റ് ജില്ലാ പ്രസിഡന്റ് രശ്മില്‍ നാഥ്, ബിഡിജെഎസ് ജില്ലാ പ്രസിഡന്റ് ഗിരീഷ് മേക്കാട്, ബിജു സാമുവല്‍ തുടങ്ങിയവര്‍ പ്രസംഗിച്ചു.
