തൃശൂര്‍ : തമിഴ്‌നാട്ടില്‍ വാഹനാപകടത്തില്‍ പരിക്കേറ്റ ചികിത്സയിലുളള നടന്‍ ഷൈന്‍ ടോം ചാക്കോയുടെയും അമ്മയുടെയും ആരോഗ്യനില തൃപ്തികരമെന്ന് ആശുപത്രി അധികൃതര്‍ അറിയിച്ചു. അപകടത്തില്‍ ഷൈന്‍ ടോം ചാക്കോയുടെ തോളിന് താഴെ മൂന്ന് പൊട്ടലുകളുണ്ട്. നട്ടെല്ലിനും ചെറിയ പൊട്ടലുണ്ട്. ശസ്ത്രക്രിയ അനിവാര്യമാണെങ്കിലും പിതാവിന്റെ സംസ്‌കാര ചടങ്ങുകള്‍ക്ക് ശേഷം തിങ്കളാഴ്ച ശസ്ത്രക്രിയ നടത്താനാണ് തീരുമാനം.
അപകടത്തില്‍ കൂടുതല്‍ പരിക്കേറ്റത് മാതാവിനാണ്. എന്നാല്‍ ഇരുവരുടെയും ആരോഗ്യസ്ഥിതിയില്‍ ആശങ്കപ്പെടേണ്ടതില്ലെന്ന് സണ്‍ മെഡിക്കല്‍ ആന്‍ഡ് റിസര്‍ച്ച് സെന്റര്‍ വ്യക്തമാക്കി.
അപകടത്തില്‍ മരിച്ച സി പി ചാക്കോയുടെ സംസ്‌കാരം തിങ്കളാഴ്ച രാവിലെ മുണ്ടൂര്‍ പരികര്‍മ്മല മാതാ പള്ളിയില്‍ നടക്കും. മുണ്ടൂരിലെ വീട്ടില്‍ ശനിയാഴ്ച വൈകിട്ട് 4 മണി മുതല്‍ പൊതുദര്‍ശനം. ഷൈനിന്റെ സഹോദരിമാര്‍ വിദേശത്ത് നിന്ന് ഇന്ന് രാത്രിയോടെ നാട്ടിലേക്ക് മടങ്ങിയെത്തും.
