നാഗ്പൂര്: ആര്എസ്എസ് പ്രവര്ത്തനം രാജ്യത്തിന്റെ ശോഭനമായ ഭാവിയുടെ അടിത്തറയും ആശാ കിരണവുമാണെന്ന് വിഖ്യാത ഗായിക ആശാ ഭോസ്ലെ. നാഗ്പൂരില് കാര്യകര്ത്താ വികാസ് വര്ഗ് ദ്വിതീയയുടെ സമാപന പൊതുപരിപാടിയ്ക്ക് ആശംസകള് അര്പ്പിച്ച് നല്കിയ സന്ദേശത്തിലാണ് ആശാ ഭോസ്ലെയുടെ അഭിപ്രായം. സര്സംഘചാലക് ഡോ. മോഹന് ഭഗവതിന്റെ ക്ഷണമനുസരിച്ച് പരിപാടിക്ക് എത്താന് ആഗ്രഹിച്ചെങ്കിലും ആരോഗ്യപരമായ കാരണങ്ങളാല് ആശാ ഭോസ്ലെയ്ക്ക് എത്താനായില്ല. തുടര്ന്ന് ആശംസകള് അര്പ്പിച്ച് സര്സംഘചാലകിന് കത്ത് അയയ്ക്കുകയായിരുന്നു.
കത്തിന്റെ ഉള്ളടക്കം:
‘കാര്യകര്ത്താ വികാസ് വര്ഗ് ദ്വിതീയ സമാപന ചടങ്ങിലേക്കുള്ള ക്ഷണത്തിന് ഞാന് അങ്ങേയറ്റം നന്ദിയുള്ളവളാണ്. അങ്ങ് എന്റെ വീട്ടിലെത്തി എന്നെ വ്യക്തിപരമായും പിന്നീട് ഔപചാരികമായും ക്ഷണിച്ചു, അതിന് നന്ദി. സംഘ ആസ്ഥാനത്ത് വന്ന് രാഷ്ട്രസേവനത്തിനായി സ്വയം സമര്പ്പിക്കാന് പരിശീലനം നേടുന്ന സ്വയംസേവകരെ കാണുക എന്നത് എന്റെ അതിയായ ആഗ്രഹമായിരുന്നു. എന്നാല് നിര്ഭാഗ്യവശാല്, അമേരിക്കയില് നിന്ന് മടങ്ങിയെത്തിയ ശേഷം, അനാരോഗ്യം കാരണം, എനിക്കതിന് സാധിക്കുന്നില്ല. പൂര്ണ വിശ്രമം എടുക്കാന് ഡോക്ടര്മാര് നിര്ദ്ദേശിച്ചിട്ടുണ്ട്. അതിനാല്, എല്ലാ തയാറെടുപ്പുകളും നടത്തിയിട്ടും, എനിക്ക് ഈ യാത്ര ഹൃദയഭാരത്തോടെ മാറ്റിവയ്ക്കേണ്ടി വന്നു.
സംഘപ്രവര്ത്തനത്തെക്കുറിച്ചുള്ള എന്റെ ആശംസകളും വികാരങ്ങളും ഞാന് ഇതിനകം പ്രകടിപ്പിച്ചിട്ടുണ്ട്. സംഘ സ്വയംസേവകരും അവരുടെ പ്രവര്ത്തനവും നമ്മുടെ രാജ്യത്തിന്റെ ശോഭനമായ ഭാവിക്ക് വലിയ അടിത്തറയും പ്രതീക്ഷാകിരണവുമാണ്. സംഘത്തിന്റെ പ്രവര്ത്തനത്തിന് ഹൃദയംഗമമായ ആശംസകള് നേരുന്നു, സാധ്യമായ എല്ലാ സഹകരണവും ഉറപ്പുനല്കുന്നു. എന്റെ ആരോഗ്യം മെച്ചപ്പെട്ടാലുടന് അങ്ങയെ കാണാന് ആഗ്രഹിക്കുന്നു, ഈ ആഗ്രഹം സഫലമാകുമെന്ന് പ്രതീക്ഷിക്കുന്നു.
