ബീജിങ് : ഷി ജിൻപിങ്ങിന്റെ അടുത്ത അനുയായിയും മുൻ ചൈനീസ് വ്യോമസേനാ ജനറലുമായ ഷു ക്വിലിയാങ് അന്തരിച്ചു. ചൈനയുടെ പ്രതിരോധ മന്ത്രാലയം നൽകിയ വിവരമനുസരിച്ച് ഷു ക്വിലിയാങ്ങിന് 75 വയസ്സായിരുന്നു. ബീജിംഗിൽ വച്ചാണ് അദ്ദേഹം അന്തരിച്ചത്.
ഷു ക്വിലിയാങ് ചൈനീസ് പ്രസിഡന്റ് ഷി ജിൻപിങ്ങിന്റെ വലം കൈയായിരുന്നു. തന്ത്രങ്ങൾ മെനയുന്നതിൽ എപ്പോഴും പ്രസിഡൻ്റിന് കൂട്ടായിരുന്നതും ഇതേ വ്യക്തിയായിരുന്നു. ചൈനീസ് പ്രസിഡന്റ് ഷി ജിൻപിങ്ങിന്റെ ആദ്യ ഭരണകാലത്ത് ഭരണകക്ഷിയായ കമ്മ്യൂണിസ്റ്റ് പാർട്ടി ഓഫ് ചൈനയുടെ സൈനിക വിഭാഗമായ പീപ്പിൾസ് ലിബറേഷൻ ആർമി (പിഎൽഎസ്)യുടെ മേൽനോട്ടം വഹിക്കുന്ന ബോഡിയുടെ ഡെപ്യൂട്ടി കമ്മീഷണറായും ഷു ക്വിലിയാങ്ങിനെ നിയമിച്ചിരുന്നു. ചൈനയിൽ ഉന്നത സ്ഥാനത്ത് എത്തിയ ശേഷം ഷു ക്വിലിയാങ് കേന്ദ്ര സൈനിക കമ്മീഷന്റെ വൈസ് പ്രസിഡന്റ് എന്ന നിലയിൽ വലിയ സ്വാധീനം സ്ഥാപിച്ചിരുന്നു.
അതേ സമയം ചൈനയുടെ പ്രതിരോധ മന്ത്രാലയം രാജ്യത്തിന്റെ മുൻ വ്യോമസേന ജനറൽ ഷു ക്വിലിയാങ്ങിനെ പ്രശംസിച്ചു. ഷു ക്വിലിയാങ് കമ്മ്യൂണിസ്റ്റ് പാർട്ടി ഓഫ് ചൈനയിലെ അംഗവും, വിശ്വസ്തനായ കമ്മ്യൂണിസ്റ്റ് സൈനികനും, സൈനിക തന്ത്രജ്ഞനും, പീപ്പിൾസ് ലിബറേഷൻ ആർമിയുടെ മികച്ച നേതാവുമായിരുന്നുവെന്ന് അദ്ദേഹത്തിന്റെ മരണത്തെക്കുറിച്ച് പ്രതിരോധ മന്ത്രാലയം ഒരു പ്രസ്താവന പുറത്തിറക്കി.
