തിരുവനന്തപുരം : മത്സ്യബന്ധനം കഴിഞ്ഞ് വീട്ടിലേക്ക് പോകവെ തെങ്ങ് വീണ് ഗുരുതര പരിക്കേറ്റ് ചികിത്സയിലായിരുന്ന യുവാവ് മരിച്ചു. വിഴിഞ്ഞം പള്ളിത്തുറ സ്വദേശി ബിബിന്‍ (29) ആണ് മരിച്ചത്. വെന്റിലേറ്ററിലായിരുന്നു ബിബിന്‍. തിങ്കളാഴ്ചയായിരുന്നു ബിബിന്റെ ദേഹത്ത് തെങ്ങ് വീണത്. ഇതോടെ സംസ്ഥാനത്ത് മഴക്കെടുതിയില്‍ മരണം മൂന്നായി.
മഴ ശക്തമായതോടെ സംസ്ഥാനത്തെ വിവിധ ജില്ലകളില്‍ കനത്ത നാശനഷ്ടമാണ് ഉണ്ടായിട്ടുള്ളത്. ശക്തമായ കാറ്റും മഴയും ആണ് ജില്ലയില്‍ അനുഭവപ്പെടുന്നത്.അടുത്ത 3 മണിക്കൂറില്‍ തിരുവനന്തപുരം, കൊല്ലം, പത്തനംതിട്ട, കോഴിക്കോട്, കണ്ണൂര്‍, കാസര്‍ഗോഡ് ചുവപ്പ് ജാഗ്രതയാണ്.
അതിനിടെ, തിരുവനന്തപുരത്ത് മൂന്നിടങ്ങളില്‍ ട്രാക്കില്‍ മരം വീണ് തടസപ്പെട്ട ട്രെയിന്‍ ഗതാഗതം ഭാഗികമായി പുനസ്ഥാപിച്ചു. കഴക്കൂട്ടം , കടയ്‌ക്കാവൂര്‍ , കൊച്ചുവേളി എന്നിവിടങ്ങളിലാണ് മരം വീണത്.
കഴക്കൂട്ടം , കടയ്‌ക്കാവൂര്‍ എന്നിവിടങ്ങളില്‍ തടസം നീക്കി കൊല്ലം ഭാഗത്തേയ്‌ക്കുള്ള ഗതാഗതം പുനസ്ഥാപിച്ചു.കൊച്ചുവേളിയില്‍ പണി നടക്കുന്നതിനാല്‍ തിരുവനന്തപുരം ഭാഗത്തേയ്‌ക്കുള്ള ട്രെയിനുകള്‍ വൈകി. മലബാര്‍ , മാവേലി , ഇന്റര്‍സിറ്റി , ഷാലിമാര്‍ , പരശുറാം , നേത്രാവതി , വേണാട് തുടങ്ങിയ ട്രെയിനുകള്‍ വൈകിയോടി.
