ന്യൂദല്ഹി: ഇന്ത്യ പാകിസ്ഥാനെ ആക്രമിച്ചേക്കും എന്ന സൂചന നല്കുന്ന വിധത്തില് പുതിയ നിര്ദേശങ്ങളുമായി കേന്ദ്ര ആഭ്യന്തരമന്ത്രാലയം. ഇന്ത്യാ പാക് യുദ്ധം നടന്നാല് പൗരന്മാര് എങ്ങിനെ ജാഗ്രതയോടെ വിവിധ യുദ്ധസാഹചര്യങ്ങളോട് പ്രതികരിക്കണം എന്നതിനെക്കുറിച്ച് സാധാരണക്കാരെ ബോധവാന്മാരാക്കാനുള്ള നിര്ദേശങ്ങള് വിവിധ സംസ്ഥാനങ്ങള്ക്ക് നല്കിയിരിക്കുകയാണ് കേന്ദ്ര ആഭ്യന്തരമന്ത്രാലയം. . ഇതിനായി മെയ് ഏഴിന് വിവിധ സംസ്ഥാനങ്ങളോട് മോക് ഡ്രില് സംഘടിപ്പിക്കാന് കേന്ദ്ര ആഭ്യന്തരമന്താലയം ഉത്തരവിട്ടിരിക്കുകയാണ്. പാകിസ്ഥാന്റെ ആക്രമണ പരിധിയിക്ക് അകത്ത് വരുന്ന അതിര്ത്തി സംസ്ഥാനങ്ങളായിരിക്കും പൗരന്മാരെ യുദ്ധസാഹചര്യത്തോട് സന്നദ്ധരാക്കാന് വേണ്ടി ഇത്തരം മോക് ഡ്രില്ലുകള് നടത്തേണ്ടിവരിക.
ഒരു യുദ്ധമുണ്ടായാല് സാധാരണജനങ്ങളുടെ ജീവന് നഷ്ടപ്പെടാതിരിക്കാന് സര്ക്കാര് പ്രത്യേകം മുന്കരുതല് എടുക്കേണ്ടതുണ്ട്.സാധാരണ പൗരന്മാര്ക്ക് കൂട്ടനാശമുണ്ടായാല് അതിന്റെ കുറ്റം കേന്ദ്രസര്ക്കാര് ഏറ്റെടുക്കേണ്ടിവരുമെന്നതിനാലാണ് ഈ പ്രത്യേക മുന്നറിയിപ്പും പരിശീലനവും.
പൗരപ്രതിരോധ സുരക്ഷാസംവിധാനങ്ങള് കാര്യക്ഷമമാക്കുകയാണ് ലക്ഷ്യം. ഇതിന്റെ ഭാഗമായി നിരവധി കാര്യങ്ങളില് പൗരന്മാരോട് ജാഗ്രതയോടെയിരിക്കാന് കേന്ദ്ര ആഭ്യന്തരമന്ത്രാലയം ആവശ്യപ്പെടുന്നു.
1, വ്യോമാക്രമണത്തിന്റെ സൈറന് മുഴക്കിയാല് എങ്ങിനെ പ്രതികരിക്കണം എന്ന് പഠിപ്പിക്കും.
2.ഒരു പ്രത്യാക്രമണമുണ്ടായാല് സ്വയം സുരക്ഷിതരായിരിക്കാന് ചെയ്യേണ്ടത് എന്തൊക്കെ എന്നത് സംബന്ധിച്ച് ജനങ്ങളെയും വിദ്യാര്ത്ഥികളേയും പരിശീലിപ്പിക്കും.
3.ചെടികളും മറ്റ് സാമഗ്രികളും ഉപയോഗിച്ച് മറഞ്ഞിരിക്കാനുള്ള പരിശീലനം.
4.അടിയന്തരഘട്ടത്തില് ആളുകളെ ഒഴിപ്പിക്കുന്നതിനെക്കുറിച്ചുള്ള ബോധവല്ക്കരണവും പരിശീലനവും.
വിവിധ സംസ്ഥാനങ്ങളോട് ഇക്കാര്യങ്ങളെക്കുറിച്ച് ജനങ്ങളെ പരിശീലിപ്പിക്കുകയും ബോധവല്ക്കരിക്കുകയും ചെയ്യാന് ആവശ്യപ്പെട്ടിരിക്കുകയാണ്. ഇതിനര്ത്ഥം ഇന്ത്യ വലിയൊരു തിരിച്ചടി പാകിസ്ഥാന് നല്കാന് ഒരുങ്ങുന്നു എന്ന് തന്നെയാണ്.
