ന്യൂദൽഹി : പഹൽഗാമിലെ ഭീകരാക്രമണത്തിന്റെ ഉത്തരവാദിത്തം ഏറ്റെടുത്ത ‘ദി റെസിസ്റ്റൻസ് ഫ്രണ്ട്’ (ടിആർഎഫ്) എന്ന ഭീകര സംഘടനയെ ആഗോള ഭീകര സംഘടനയായി അമേരിക്ക പ്രഖ്യാപിച്ചതിനെ സ്വാഗതം ചെയ്ത് വിദേശകാര്യ മന്ത്രി എസ് ജയ്ശങ്കർ. ഇന്നലെയാണ് ടിആർഎഫ് നെ യുഎസ് ആഗോള ഭീകര സംഘടനയായി പ്രഖ്യാപിച്ചത്.
യുഎസ് തീരുമാനത്തെ വിദേശകാര്യ മന്ത്രി എസ്. ജയ്ശങ്കർ സ്വാഗതം ചെയ്യുകയും പിന്തുണയ്‌ക്കുകയും ചെയ്തു. ഇന്ത്യയും യുഎസും തമ്മിലുള്ള ശക്തമായ ഭീകരവിരുദ്ധ സഹകരണത്തിന്റെ ഉദാഹരണമാണിതെന്ന് അദ്ദേഹം വിശേഷിപ്പിച്ചു. യുഎസ് സ്റ്റേറ്റ് സെക്രട്ടറി മാർക്കോ റൂബിയോയെയും യുഎസ് സ്റ്റേറ്റ് ഡിപ്പാർട്ട്‌മെന്റിനെയും പ്രശംസിച്ചുകൊണ്ട് സോഷ്യൽ മീഡിയയിലെ ഒരു പോസ്റ്റിലാണ് അദ്ദേഹം ഇക്കാര്യം പറഞ്ഞത്.
ഈ തീരുമാനം തീവ്രവാദത്തിനെതിരായ അന്താരാഷ്‌ട്ര സമൂഹത്തിന്റെ ഐക്യദാർഢ്യത്തെ പ്രതിഫലിപ്പിക്കുന്നുവെന്നും അദ്ദേഹം വ്യക്തമാക്കി. നേരത്തെ ഭീകരതയ്‌ക്കെതിരായ ആഗോള പോരാട്ടത്തിലെ ഒരു സുപ്രധാന ചുവടുവയ്‌പ്പായിട്ടാണ് ഇന്ത്യ ഈ തീരുമാനത്തെ വിശേഷിപ്പിച്ചത്.
