തിരുവനന്തപുരം:സംസ്ഥാനത്ത് പേ വിഷ ബാധയേറ്റുളള മരണം ഏറുന്നത് ആശങ്ക സൃഷ്ടിക്കുന്നു. ഏപ്രില് മാസത്തില് മാത്രം ആറ് പേരാണ് പേവിഷബാധയേറ്റ് മരിച്ചത്. ഒരു മാസത്തിനിടെ സംസ്ഥാനത്ത് പേവിഷ ബാധയേറ്റ് മരിച്ചത് മൂന്ന് കുഞ്ഞുങ്ങളാണ്.
നായ് കടിച്ച ശേഷം കുത്തിവയ്പെടുത്തവരും മരണത്തിന് കീഴടങ്ങിയതാണ് കടുത്ത ആശങ്ക സൃഷ്ടിക്കുന്നത്.വാക്സിന്റെ ഗുണനിലവാരത്തില് പൊതുജനങ്ങളില് ആശങ്ക സൃഷ്ടിച്ചിട്ടുണ്ട്.എന്നാല് വാക്സിന് ഗുണനിലവാരമുളളതാണെന്നാണ് പരിശോധനയില് വ്യക്തമായതെന്നാണ് ആരോഗ്യമന്ത്രി വീണ ജോര്ജും ഡോക്ടര്മാരും പറയുന്നത്.
ഏറ്റവും ഒടുവില് പേവിഷ ബാധയേറ്റ് മരിച്ചത് തിരുവനന്തപുരം എസ്എടിയില് ചികിത്സയിലായിരുന്ന ഏഴ് വയസുകാരി നിയ ഫൈസല് ആണ്. കുട്ടി വെന്റിലേറ്റര് സഹായത്തിലായിരുന്നു.
കൊല്ലം വിളക്കൊടി കുന്നിക്കോട് സ്വദേശിനിയാണ് നിയ.ദിവസങ്ങള്ക്ക് മുമ്പാണ് മലപ്പുറം പെരുവള്ളൂര് സ്വദേശിനി സിയ ഫാരിസ് കോഴിക്കോട് മെഡിക്കല് കോളേജില് മരിച്ചത്. ഇതിന് പിന്നാലെയാണ് നിയ ഫൈസലിന്റെ മരണം.
ഏപ്രില് എട്ടിന് ഉച്ചയ്ക്ക് വീട്ടുമുറ്റത്ത് വച്ചാണ് നിയ ഫൈസലിനെ താറാവിനെ ഓടിച്ചെത്തിയ നായ് കടിച്ചത്. ഉടന് തന്നെ ഐ.ഡി.ആര്.വി ഡോസ് എടുത്തിരുന്നു. അന്ന് തന്നെ ആന്റി റാബിസ് സിറവും നല്കി. പിന്നീട് മൂന്ന് തവണ കൂടി ഐഡിആര്വി നല്കി. ഇതില് മേയ് ആറിന് ഒരു ഡോസ് മാത്രമാണ് ബാക്കിയുണ്ടായിരുന്നത്. ഇതിനിടെ ഏപ്രില് 28 ന് കുട്ടിക്ക് പനി ബാധിച്ചതിനെ തുടര്ന്ന് പരിശോധിച്ചപ്പോഴാണ് പേവിഷ ബാധയേറ്റെന്ന് മനസിലായത്.
