ഏപ്രില്‍ 21 വൈകിട്ട് 4 വരെ
ഓണ്‍ലൈനായി രജിസ്റ്റര്‍ ചെയ്യാം
കാലിക്കറ്റ് സര്‍വ്വകലാശാലയുടെ 2025-27 വര്‍ഷത്തെ ദ്വിവത്‌സര ഫുള്‍ടൈം എംബിഎ, എംബിഎ (ഹെല്‍ത്ത് കെയര്‍ മാനേജ്‌മെന്റ്), എംബിഎ (ഇന്റര്‍നാഷണല്‍ ഫിനാന്‍സ്) പ്രോഗ്രാമുകളില്‍ പ്രവേശനത്തിന് ഓണ്‍ലൈനായി ഏപ്രില്‍ 21 വൈകിട്ട് 4 മണിവരെ രജിസ്റ്റര്‍ ചെയ്യാം. ഡിപ്പാര്‍ട്ടുമെന്റ് ഓഫ് കോമേഴ്‌സ് ആന്റ് മാനേജ്‌മെന്റ് സ്റ്റഡീസ്, സ്വാശ്രയ സ്‌കൂള്‍ ഓഫ് മാനേജ്‌മെന്റ് സ്റ്റഡീസ്, അഫിലിയേറ്റഡ് സ്വാശ്രയ ഇന്‍സ്റ്റിറ്റിയൂട്ടുകള്‍/കോളേജുകള്‍ എന്നിവിടങ്ങളിലാണ് പഠനാവസരം. മെരിറ്റ് സീറ്റുകളിലും മാനേജ്‌മെന്റ് ക്വാട്ടാ സീറ്റുകളിലും പ്രവേശനം തേടുന്നവര്‍ ഓണ്‍ലൈനായി രജിസ്റ്റര്‍ ചെയ്തിരിക്കണം. സ്ഥാപനങ്ങളും കോഴ്‌സുകളും സീറ്റുകളും യോഗ്യതാമാനദണ്ഡങ്ങളും പ്രവേശന നടപടികളും അടങ്ങിയ വിജ്ഞാപനവും പ്രോസ്‌പെക്ടസും http://admission.uoc.ac.in ല്‍ ലഭ്യമാണ്.
പ്രവേശന യോഗ്യത: കാലിക്കറ്റ് ഉള്‍പ്പെടെ അംഗീകൃത സര്‍വ്വകലാശാലയില്‍ നിന്നും മൊത്തം 50 ശതമാനം മാര്‍ക്കില്‍/തത്തുല്യ ഗ്രേഡില്‍ കുറയാതെ ബിരുദം. എസ്ഇബിസി/ഒഇസി വിഭാഗങ്ങളില്‍പ്പെടുന്നവര്‍ക്ക് 45% മാര്‍ക്കും എസ്‌സി/എസ്ടി/പിഡബ്ല്യുഡി വിഭാഗങ്ങള്‍ക്ക് മിനിമം പാസ്മാര്‍ക്കും മതിയാകും. ഫൈനല്‍ ഡിഗ്രി പരീക്ഷാഫലം കാത്തിരിക്കുന്നവര്‍ക്കും അപേക്ഷിക്കാം.
കെമാറ്റ്-2025/ഐഐഎം കാറ്റ് (നവംബര്‍ 2024)/സിമാറ്റ്-2025 സ്‌കോര്‍ നേടിയിരിക്കണം.
എന്‍ട്രന്‍സ് ടെസ്റ്റ് സ്‌കോര്‍, പ്ലസ്ടു മാര്‍ക്ക്, ഗ്രൂപ്പ് ചര്‍ച്ച, വ്യക്തിഗത അഭിമുഖം എന്നിവയുടെ അടിസ്ഥാനത്തിലാണ് സെലക്ഷന്‍.
അപേക്ഷാ ഫീസ്: ജനറല്‍ 920 രൂപ, എസ്‌സി/എസ്ടി വിഭാഗത്തിന് 310 രൂപ. പ്രോസ്‌പെക്ടസിലെ നിര്‍ദ്ദേശങ്ങള്‍ പാലിച്ച് അപേക്ഷിക്കേണ്ടതാണ്.
യൂണിവേഴ്‌സിറ്റി ടീച്ചിങ് ഡിപ്പാര്‍ട്ടുമെന്റിലെ ഓപ്പണ്‍ ഓള്‍ ഇന്ത്യ ക്വാട്ടാ സീറ്റുകളില്‍ ജനറല്‍ വിഭാഗത്തില്‍പ്പെടുന്നവര്‍ക്കാണ് പ്രവേശനം. സംവരണമടക്കം കൂടുതല്‍ വിവരങ്ങള്‍ പ്രോസ്‌പെക്ടസിലുണ്ട്.
