ലഖ്‌നൗ : യുപിയിലെ ലഖ്‌നൗവിലെ ദിലാവർ നഗറിനും റഹിമാബാദ് സ്റ്റേഷനുകൾക്കുമിടയിലുള്ള റെയിൽവേ ട്രാക്കിൽ വൻ ട്രെയിൻ ദുരന്തം ഒഴിവായത് തലനാരിഴയ്‌ക്ക്. റെയിൽവേ ട്രാക്കിൽ ഒരു മരക്കഷണം സ്ഥാപിച്ച് ചില അക്രമികൾ ട്രെയിൻ പാളം തെറ്റിക്കാൻ ശ്രമിച്ചത് ലോക്കോ പൈലറ്റിന്റെയും സുരക്ഷാ ജീവനക്കാരുടെയും സമയോചിതമായ ഇടപെടലിൽ ഇല്ലാതാകുകയായിരുന്നു.
രണ്ടര അടി നീളവും ആറ് ഇഞ്ച് കനവുമുള്ള ഒരു മരക്കഷണം ആരോ മനപൂർവം റെയിൽവേ ട്രാക്കിൽ വച്ചിരുന്നു. അതേ റെയിൽവേ ട്രാക്കിൽ സഹർസയിൽ നിന്ന് ആനന്ദ് വിഹാറിലേക്കുള്ള ഗരീബ് രഥ് സ്പെഷ്യൽ ട്രെയിൻ (05577) പുലർച്ചെ 2.45 ന് എത്തേണ്ടതായിരുന്നു.
അതേ സമയം കാശി വിശ്വനാഥ് എക്സ്പ്രസിന്റെ ലോക്കോ പൈലറ്റ് ഈ മരക്കഷണം കണ്ടു. തുടർന്ന് ലോക്കോ പൈലറ്റ് ഇക്കാര്യം റഹിമാബാദ് സ്റ്റേഷൻ മാസ്റ്ററെ അറിയിച്ചു. ഈ വിവരം ലഭിച്ചയുടൻ സ്റ്റേഷൻ മാസ്റ്റർ ഗരീബ് രഥ് ട്രെയിൻ മാലിഹാബാദ് സ്റ്റേഷനിൽ നിർത്തി. ഇതിനുശേഷം റെയിൽവേ ജീവനക്കാർ ട്രാക്കിൽ നിന്ന് മരക്കഷണം നീക്കം ചെയ്തു.
സംഭവത്തിൽ റഹിമാബാദ് പോലീസ് സ്റ്റേഷനിൽ എഫ്‌ഐആർ രജിസ്റ്റർ ചെയ്തിട്ടുണ്ട്. ഇതിന് പിന്നിലെ ഗൂഢാലോചനയെക്കുറിച്ച് ആർ‌പി‌എഫും ജി‌ആർ‌പിയും അന്വേഷിക്കുന്നുണ്ട്.
