ന്യൂദല്‍ഹി: 2030ല്‍ ഇന്ത്യ 7ലക്ഷംകോടി ഡോളറിന്റെ സമ്പദ് വ്യവസ്ഥയായി മാറുമെന്ന് ഡ്യൂഷേ ബാങ്ക് സിഇഒ കൗഷിക് ഷപാരിയ. അടുത്ത അഞ്ച് വര്‍ങ്ങളില്‍ ഇന്ത്യയുടെ വളര്‍ച്ച നിര്‍ണ്ണായകമാണെന്നും ഏഴ് മുതല്‍ എട്ട് ശതമാനം വരെ വളര്‍ച്ച ഇന്ത്യ നിലനിര്‍ത്തുമെന്നും ഡ്യൂഷേ ബാങ്കിന്റെ ഇന്ത്യയുടേയും എമര്‍ജിങ്ങ് എഷ്യയുടെയും സിഇഒ ആയ കൗഷിക് ഷപാരിയ പറഞ്ഞു.
മറ്റ് രാജ്യങ്ങളുടേതുമായി താരതമ്യം ചെയ്യുമ്പോള്‍ ഇന്ത്യയുടേത് വെറും വളര്‍ച്ചയായിരിക്കില്ലെന്നും വെറുമൊരു സാമ്പത്തിക വികാസം എന്നതിനപ്പുറമുള്ള കുതിപ്പായിരിക്കുമെന്നും കൗഷിക് ഷപാരിയ പറഞ്ഞു. എല്ലാവരേയും ഉള്‍ക്കൊള്ളുന്ന ഒരു വികസനത്തില്‍ ഇന്ത്യ ശ്രദ്ധിക്കണമെന്നും ആളോഹരി വരുമാനവും ഘടനപരമായ പരിവര്‍ത്തനങ്ങളും സുസ്ഥിരമായി നിലനിര്‍ത്താന്‍ കഴിയണമെന്നും അദ്ദേഹം പറഞ്ഞു. അതുപോലെ എല്ലാവര്‍ക്കും ഒരുപോലെ പുരോഗതി കൈവരിക്കാനാകുകയും വേണം. -കൗഷിക് ഷപാരിയ പറഞ്ഞു.
2023ല്‍ നിന്നും 2030ല്‍ എത്തുന്നതോടെ ഇന്ത്യയുടെ സമ്പദ് വ്യവസ്ഥ ഇരട്ടിയായി. 2023ല്‍ വെറും 3.5 ലക്ഷം കോടി ഡോളര്‍ മാത്രമായിരുന്ന ഇന്ത്യയുടെ സമ്പദ് വ്യവസ്ഥയാണ് 2030ല്‍ 7 ലക്ഷം കോടി ഡോളര്‍ ആയി മാറിയത്. -കൗഷിക് ഷപാരിയ ചൂണ്ടിക്കാട്ടി. ഈ ദശകത്തിന്റെ അവസാനത്തോടെ ഇന്ത്യയുടെ ആളോഹരി വരുമാനവും ഇരട്ടിയാകും. ഏകദേശം 4500 ഡോളര്‍ ആയി അത് മാറും.
