വാഷിങ്ടണ്: ചൈനയിലുള്ള യുഎസ് സര്ക്കാര് ഉദ്യോഗസ്ഥര് ചൈനീസ് പൗരന്മാരുമായി പ്രണയത്തിലേര്പ്പെടുന്നതും ശാരീരികബന്ധം പുലര്ത്തുന്നതും ട്രംപ് സര്ക്കാര് വിലക്കി. ചൈനയിലുള്ള യുഎസ് നയതന്ത്രജ്ഞര്, ഇവരുടെ കുടുംബാംഗങ്ങള്, സര്ക്കാര് നിയമിച്ച മറ്റു ഉദ്യോഗസ്ഥര് തുടങ്ങിയവര്ക്കാണ് വിലക്ക്.
ബെയ്ജിങ്ങിലെ യുഎസ് എംബസി, ഷാങ്ഹായ്, ഷെനിയാങ്, വുഹാന്, ഹോങ്കോങ് തുടങ്ങിയ സ്ഥലങ്ങളിലെ കോണ്സുലേറ്റുകള് എന്നിവിടങ്ങളില് ജോലിചെയ്യുന്ന ഉദ്യോഗസ്ഥര്ക്കാണ് പ്രധാനമായും പുതിയ നിര്ദേശം ബാധകമാക്കിയിരിക്കുന്നത്. ഉദ്യോഗസ്ഥര്ക്ക് പുറമേ ഇവരുടെ കുടുംബാംഗങ്ങള്ക്കും രഹസ്യ വിവരങ്ങള് കൈകാര്യംചെയ്യുന്ന സര്ക്കാര് നിയോഗിച്ച മറ്റു ഉദ്യോഗസ്ഥര്ക്കും പുതിയ നിര്ദേശം ബാധകമാണ്.
അതേസമയം, നിലവില് ചൈനീസ് പൗരന്മാരുമായി ഏതെങ്കിലും രീതിയിലുള്ള ബന്ധമുള്ളവര്ക്ക് ഇക്കാര്യത്തില് ഇളവ് തേടാന് അപേക്ഷ നല്കാം. എന്നാല്, ഈ അപേക്ഷ നിരസിക്കുകയാണെങ്കില് ചൈനീസ് പൗരന്മാരുമായുള്ള ബന്ധം ഉപേക്ഷിക്കുകയോ അല്ലെങ്കില് ജോലി ഉപേക്ഷിക്കുകയോ ചെയ്യണം. നിര്ദേശം പരസ്യമായി പ്രഖ്യാപിച്ചിട്ടില്ലെങ്കിലും ജനുവരിയില്ത്തന്നെ ഉദ്യോഗസ്ഥര്ക്ക് ഇതുസംബന്ധിച്ച് വിവരങ്ങള് കൈമാറിയതായാണ് റിപ്പോര്ട്ട്. ചൈന കേന്ദ്രീകരിച്ച് പ്രവര്ത്തിച്ചിരുന്ന രണ്ട് അമേരിക്കന് നയതന്ത്ര ഉദ്യോഗസ്ഥരെ ചൈനീസ് ഏജന്റുമാര് വശീകരിച്ച് ഹണിട്രാപ്പില് കുടുക്കിയതിനെക്കുറിച്ച് അടുത്തിടെ റിപ്പോര്ട്ടു വന്നിരുന്നു.
