പത്തനംതിട്ട: മീനമാസ പൂജയ്ക്ക് ശബരിമല നട തുറക്കുമ്പോള്‍ സന്നിധാനത്ത് പരീക്ഷണാടിസ്ഥാനത്തില്‍ ഏര്‍പ്പെടുത്തിയ പുതിയ സംവിധാനത്തിലൂടെ ദര്‍ശനം ഒരുക്കും. പതിനെട്ടാംപടി കയറിയെത്തുന്ന തീര്‍ത്ഥാടകര്‍ക്ക് ഫ്ളൈഓവര്‍ ഒഴിവാക്കി നേരിട്ട് ദര്‍ശനം നടത്താനുള്ള സംവിധാനമാണ് ഒരുക്കുന്നത്. ഇതുമായി ബന്ധപ്പെട്ട നിര്‍മാണ പ്രവര്‍ത്തനങ്ങള്‍ സന്നിധാനത്ത് പുരോഗമിക്കുന്നു. പുതിയരീതി പരീക്ഷണാടിസ്ഥാനത്തില്‍ മീനമാസ പൂജയ്ക്ക് നടതുറക്കുന്ന 14 മുതല്‍ നടപ്പാക്കും. പതിനെട്ടാം പടി കയറിയെത്തുന്ന തീര്‍ത്ഥാടകരെ കൊടിമരത്തിന്റെ ഇരുവശങ്ങളിലൂടെ ബലിക്കല്‍പ്പുര വഴി നേരിട്ട് ശ്രീകോവിലിന് മുമ്പിലേക്ക് പ്രവേശിപ്പിക്കുന്നതാണ് പുതിയ സംവിധാനം.
ഫ്ളൈ ഓവറിലൂടെ കടത്തിവിടുമ്പോള്‍ ശ്രീകോവിലിന് മുന്നിലെത്തുന്ന തീര്‍ത്ഥാടകര്‍ക്ക് നാലോ അഞ്ചോ സെക്കന്റ് മാത്രമാണ് ദര്‍ശനം സാധ്യമാകുക. പുതിയ സംവിധാനം നടപ്പാക്കിയാല്‍ 20 സെക്കന്റ് സമയമെങ്കിലും ദര്‍ശനം ലഭിക്കും എന്നതാണ് പ്രത്യേകത. തീര്‍ത്ഥാടകരുടെ രണ്ടു നിരകളെ വേര്‍തിരിച്ച് നീളത്തില്‍ കാണിക്കവഞ്ചി സ്ഥാപിക്കും. ദര്‍ശനത്തോടൊപ്പം കാണിക്ക സമര്‍പ്പിക്കാനും ഇത് ഭക്തരെ സഹായിക്കും. ഇരുമുടിക്കെട്ടില്ലാതെ വടക്കേനടയിലൂടെ എത്തുന്നവരെ ശ്രീകോവിലിന് മുമ്പിലെ നിരയിലേക്ക് കടത്തിവിടും. തന്ത്രിയുടെ അനുജ്ഞയും ഹൈക്കോടതിയുടെ അനുമതിയും ലഭ്യമായതോടെയാണ് കഴിഞ്ഞമാസം പുതിയ സംവിധാനത്തിനായി നിര്‍മാണ ജോലികള്‍ ആരംഭിച്ചത്.
തീര്‍ത്ഥാടനക്കാലത്ത് തിരക്ക് മരക്കൂട്ടം വരെ നീളുന്ന സാഹചര്യം ഉണ്ടായാല്‍ നിയന്ത്രിക്കാനായി ഫ്ളൈഓവര്‍ നിലനിര്‍ത്താനാണ് തീരുമാനം. മാസപൂജയ്‌ക്ക് നടതുറക്കുന്ന അഞ്ചു ദിവസം പരീക്ഷണാടിസ്ഥാനത്തില്‍ ദര്‍ശനം അനുവദിച്ച ശേഷം ആവശ്യമെങ്കില്‍ മാറ്റങ്ങള്‍ വരുത്തും.
