മുംബൈ: അതിക്രൂരമായി ശിവജി മഹാരാജിന്റെ മകനും ഹിന്ദുസ്വരാജിന് വേണ്ടി പോരാടുകയും ചെയ്ത സാംബാജി മഹാരാജിനെ ഇഞ്ചിഞ്ചായി കൊന്ന ക്രൂരനായ ഔറംഗസേബിനെ മഹാനായ ഭരണാധികാരി എന്ന് വിളിച്ച സമാജ് വാദി പാര്ട്ടി എംഎല്എ അബു ആസ്മി പരസ്യമായി മാപ്പ് പറയണമെന്ന് മഹാരാഷ്ട്ര ഉപമുഖ്യമന്ത്രി ഏക്നാഥ് ഷിന്ഡേ. ഈയിടെ ഒരു പൊതുപ്രസംഗത്തിലാണ് ഔറംഗസേബ് മഹാനായ ഭരണാധികാരിയാണെന്ന് അബു ആസ്മി അഭിപ്രായപ്പെട്ടത്.
” ഔറംഗസേബ് സാംബാജി മഹാരാജിനെ ക്രൂരമായി കൊല്ലപ്പെടുത്തിയ സംഭവം നമ്മുടെ ചരിത്രത്തിലെ കറുത്ത പാടാണ്. സാംബാജി മഹാരാജിന്റെ ജീവനെടുക്കുക മാത്രമല്ല, അദ്ദേഹത്തെ ഇസ്ലാമിലേക്ക് പരിവര്ത്തനം ചെയ്യാന് ശ്രമിക്കുകയും ചെയ്തു ഔറംഗസേബ്. നമ്മുടെ വിശ്വാസത്തെ സംരക്ഷിക്കാനും സാംസ്കാരികപൈതൃകത്തെ ഉയര്ത്തിപ്പിടിക്കാനും ശ്രമിച്ച മഹദ് വ്യക്തിയാണ് സാംബാജി മഹാരാജ്. “- ഏക്നാഥ് ഷിന്ഡേ പറഞ്ഞു.
“ഔറംഗസേബ് ചക്രവര്ത്തിയെ മഹത്വവല്ക്കരിക്കാന് അബു ആസ്മി നടത്തിയ ശ്രമം നമ്മുടെ ചരിത്രത്തെ അപമാനിക്കുകയായിരുന്നു. നമ്മുടെ സ്വത്വത്തിന് വേണ്ടി പോരാടിയവരുടെ മഹത്വത്തെ അവഹേളിക്കലുമാണ്. ഇത്തരം പ്രസ്താവനകള് ദേശവിരുദ്ധമാണ്. “- ഏക്നാഥ് ഷിന്ഡേ പറഞ്ഞു.
“ഇനി അബു ആസ്മിയ്ക്ക് ഒരു വഴിയേ ഉള്ളൂ. തന്റെ പ്രസ്താവന പുനപരിശോധിച്ച ശേഷം മഹാരാഷ്ട്രയിലെ മുഴുവന് ജനങ്ങളോടും മാപ്പ് പറയുക.” – ഏക്നാഥ് ഷിന്ഡേ അഭിപ്രായപ്പെട്ടു.
ഛാവ: ഔറംഗസേബ് ചക്രവര്ത്തിയ്ക്കെതിരായ ജനരോഷം ആളിക്കത്തുന്നു
ഈയിടെ പുറത്തിറങ്ങിയ ഛാവ എന്ന ഹിന്ദി സിനിമ സാംബാജി മഹാരാജിന്റെ കഥയാണ് പറയുന്നത്. ഹിന്ദുസ്വരാജ് നിലനിര്ത്താന് പോരാടിയ അദ്ദേഹം ഒമ്പത് വര്ഷം ഔറംഗസേബുമായി യുദ്ധം ചെയ്തു. പക്ഷെ ഇടയില് ചതിയിലൂടെ പിടിക്കപ്പെട്ടു. പിന്നീട് അദ്ദേഹത്തിന്റെ നാക്ക് പിഴുതെടുത്തു. നഖം പറിച്ചുകളഞ്ഞു. കൈകള് വെട്ടിക്കളഞ്ഞു. ഒടുവില് കണ്ണുകൂടി ചുഴ്ന്നെടുത്തു. ഇതെല്ലാം ഔറംഗസേബ് ചക്രവര്ത്തിയുടെ ക്രൂരതകളാണ്. ഈ സിനിമ വന്നതോടെ ഔറംഗസേബ് ചക്രവര്ത്തിയ്ക്കെതിരായ ജനരോഷം മഹാരാഷ്ട്രയില് ആളിക്കത്തുകയാണ്.
