ടാറ്റാ സ്റ്റീല് ചെസില് ലോക രണ്ടാം നമ്പര് താരമായ അമേരിക്കയുടെ ഫാബിയാനോ കരുവാനയെ അട്ടിമറിച്ച് ഇന്ത്യന് കൗമാരതാരം പ്രജ്ഞാനന്ദ. 11ാം റൗണ്ടിലാണ് പ്രജ്ഞാനന്ദയുടെ ഈ അവിശ്വസനീയമായ അട്ടിമറി. ഇതോടെ പ്രജ്ഞാനന്ദയ്ക്ക് ഏഴര പോയിന്റായി. അതേ സമയം 11ാം റൗണ്ടിന് ശേഷവും പോയിന്റ് നിലയില് ഇന്ത്യയുടെ ഗുകേഷ് തന്നെ ഈ ടൂര്ണ്ണമെന്റില് ഒന്നാം സ്ഥാനത്ത് തുടരുകയാണ്.
ചൈനയുടെ വെയ് യിയുമായുള്ള ഗുകേഷിന്റെ പോരാട്ടം സമനിലയില് കലാശിച്ചതോടെ ഗുകേഷിന് എട്ട് പോയിന്റായി. ഇപ്പോള് പ്രജ്ഞാനന്ദയും ഗുകേഷും തമ്മില് അര പോയിന്റ് വ്യത്യാസമേ ഉള്ളൂ.
പ്രജ്ഞാനന്ദ അപകടകരമായ ആക്രമണോത്സുകതയാണ് ഈ ടൂര്ണ്ണമെന്റില് ഉടനീളം പ്രകടിപ്പിച്ചത്. പരിചയസമ്പന്നരായ എതിരാളികളെപ്പോലും പ്രജ്ഞാനന്ദ അസാധാരണനീക്കത്തിലൂടെ അമ്പരപ്പിക്കുകയാണ്. ആകെ 11 മത്സരങ്ങള് കളിച്ച പ്രജ്ഞാനന്ദ ഒമ്പതാം റൗണ്ടില് ഡച്ച് താരം അനീഷ് ഗിരിയുമായി മാത്രമാണ് തോറ്റത്.
ഗുകേഷാകട്ടെ ഈ 11 റൗണ്ടുകളില് ഒരു തോല്വി പോലും ഏറ്റുവാങ്ങാതെയാണ് ഏട്ട് പോയിന്റ് നേടിയത്. അഞ്ച് ജയവും ഗുകേഷ് നേടി.
