കരുനാഗപ്പള്ളി: റഷ്യന്‍-ഉക്രൈന്‍ യുദ്ധഭൂമിയില്‍ നിന്ന് അവര്‍ എത്തിയത് ശാന്തിയുടെ തീരമായ അമൃതപുരിയില്‍. ശത്രുരാജ്യങ്ങള്‍ക്കിടയിലെ വിദ്വേഷവും പകയും അവര്‍ക്കിടയില്‍ അസ്തമിച്ചു. പിന്നെ അമൃതവര്‍ഷമായി പ്രണയം പെയ്തിറങ്ങി. ഒടുവില്‍ മാതാ അമൃതാനന്ദമയി ദേവിയുടെ സാന്നിധ്യത്തില്‍ വിവാഹവും.
ഉക്രൈനിലെ കീവ് സ്വദേശിയാണ് സാഷ. റഷ്യയിലെ മോസ്കോ സ്വദേശിനിയാണ് ഒള്യ. അമ്മയുടെ യൂറോപ്യന്‍ സന്ദര്‍ശന വേളയിലാണ് രണ്ടുപേരും അമ്മയെക്കുറിച്ച് അറിയുന്നതും നേരില്‍ കാണുന്നതും. പിന്നെ അതൊരു പതിവായി. ഒടുവില്‍ രണ്ടുപേരും പലപ്പോഴായി ആശ്രമത്തിലെത്തി. സേവന പ്രവര്‍ത്തനങ്ങളിലും ആധ്യാത്മിക പഠനത്തിലും വ്യാപൃതരായി. സാഷ ശാശ്വത് എന്ന പേരും ഒള്യ സാവിത്രി എന്ന പേരും സ്വീകരിച്ചു.
2019ലാണ് ഇരുവരും പരിചയപ്പെടുന്നത്. പരിചയം പതുക്കെ പ്രണയത്തിനു വഴിമാറി. സ്വദേശത്തേക്ക് മടങ്ങിയപ്പോഴും ബന്ധം തുടര്‍ന്നു. എന്നാല്‍ ഇരുരാജ്യങ്ങള്‍ തമ്മിലുള്ള സംഘര്‍ഷവും കൊവിഡ് കാലഘട്ടവും വെല്ലുവിളികള്‍ സൃഷ്ടിച്ചു. ഒടുവില്‍ റഷ്യന്‍-ഉക്രൈന്‍ യുദ്ധം മൂര്‍ച്ഛിച്ചപ്പോള്‍ 2023ലാണ് ഇരുവരും അമൃതപുരിയിലേക്ക് തന്നെ തിരിച്ചുവന്നത്. ആറു വര്‍ഷത്തെ പ്രണയം ഒടുവില്‍ 23ന് വിവാഹത്തിലെത്തി. അമൃത സര്‍വകലാശാലയിലെ അമ്മച്ചി ലാബില്‍ ഗവേഷണ വിദ്യാര്‍ത്ഥിയാണ് ശാശ്വത്. യുദ്ധമേഖലയിലുള്ളവര്‍ അനുഭവിക്കുന്ന മാനസിക സംഘര്‍ഷം ലഘൂകരിക്കുക എന്ന ലക്ഷ്യത്തോടെയുള്ള ഓഫ്ലൈന്‍, ഓണ്‍ലൈന്‍ കൗണ്‍സലിങ്ങിനും ശാശ്വത് നേതൃത്വം നല്‍കുന്നു.
ആശ്രമ പ്രവര്‍ത്തനത്തോടൊപ്പം മന:ശാസ്ത്ര പഠനത്തില്‍ ശ്രദ്ധ കേന്ദ്രീകരിച്ചിരിക്കുകയാണ് സാവിത്രി. സ്നേഹം മാത്രം ചൊരിയുന്ന അമ്മയുടെ ദിവ്യസാന്നിധ്യത്തില്‍ ജീവിതത്തില്‍ ഒന്നിക്കാനായി എന്നത് സ്വപ്‌നസാഫല്യമായെന്ന് ഇരുവരും വ്യക്തമാക്കി. ഈ വിവാഹ മുഹൂര്‍ത്തം ഒരു വലിയ സന്ദേശമാണെന്നും ലോകത്തുള്ള എല്ലാ സംഘര്‍ഷങ്ങളും അവസാനിക്കാന്‍ എല്ലാവരും പ്രാര്‍ത്ഥിക്കണമെന്നും അമ്മ പറഞ്ഞു.
