കാസര്‍കോട് : ലൈംഗിക ആരോപണത്തെ തുടര്‍ന്ന് അദ്ധ്യാപകനായ മുന്‍ ഡി വൈ എഫ് ഐ നേതാവ് സുജിത് കൊടക്കാടനോട് അവധിയില്‍ പോകാന്‍ നിര്‍ദ്ദേശിച്ച് സ്‌കൂള്‍ മാനേജ്മന്റ്. ഉദിനൂര്‍ സെന്‍ട്രല്‍ എ യു പി സ്‌കൂള്‍ മാനേജ്‌മെന്റ് ആണ് നടപടി എടുത്തത്.
യുവതികള്‍ ഉന്നയിച്ച ലൈംഗികാരോപണം സംബന്ധിച്ച് സുജിത്തിനോട് വിശദീകരണം തേടും. രക്ഷാകര്‍ത്താക്കളുടെ ആശങ്ക കണക്കിലെടുത്താണ് സ്‌കൂള്‍ മാനേജ്‌മെന്റ് സുജിത് കൊടക്കാടനോട് അവധിയില്‍ പോകാന്‍ നിര്‍ദ്ദേശിച്ചത്.
സിപിഎം ഏരിയാകമ്മിറ്റി അംഗവും ഡിവൈഎഫ്‌ഐ തൃക്കരിപ്പൂര്‍ ബ്ലോക്ക് സെക്രട്ടറിയുമായ സുജിത് കൊടക്കാടിനെ പാര്‍ട്ടിയുടെ ഏരിയാ കമ്മിറ്റിയില്‍ നിന്ന് പുറത്താക്കിയിട്ടുണ്ട്.ഡിവൈഎഫ്‌ഐ തൃക്കരിപ്പൂര്‍ ബ്ലോക്ക് സെക്രട്ടറി സ്ഥാനത്തുനിന്നും നീക്കി. സുജിത്തിനെതിരെ സിപിഎം ജില്ലാ സെക്രട്ടറിക്ക് പരാതി ലഭിച്ച പ്രകാരം പാര്‍ട്ടി അന്വേഷണം നടത്തിയാണ് നടപടി സ്വീകരിച്ചത്.
സുജിത്തിനെതിരെ സമൂഹമാധ്യമത്തില്‍ യുവതി ആരോപണം ഉന്നയിച്ചിരുന്നു.എന്നാല്‍ പൊലീസിന് പരാതി ലഭിച്ചിട്ടില്ലെന്നാണ് റിപ്പോര്‍ട്ട്. ഇന്‍സ്റ്റഗ്രാം റീലുകളിലൂടെപ്രത്യേകിച്ചും പുസ്തക നിരൂപണങ്ങളുമായി ബന്ധപ്പെട്ടുള്ള വീഡിയോകളിലൂടെ ശ്രദ്ധേയനാണ് സുജിത്ത്.
