യമുനയിൽ വിഷം കലർത്തിയെന്ന കെജ്‌രിവാളിന്റെ ആരോപണത്തിനെതിരെ നിയമനടപടിയുമായി ഹരിയാന ളിന്റെ

ന്യൂദെൽഹി:യമുനാ നദിയിലെ വെള്ളത്തിൽ ഹരിയാന സർക്കാർ വിഷം കലക്കിയെന്ന് വ്യാജ ആരോപണമുന്നയിച്ച ആം ആദ്മി പാർട്ടി കൺവീനറും ദെൽഹി മുൻ മുഖ്യമന്ത്രിയുമായ അരവിന്ദ് കെജ്‌രിവാളിനെതിരെ മാനനഷ്ട കേസ് ഫയൽ ചെയ്യുമെന്ന് ഹരിയാന മുഖ്യമന്ത്രി നയാബ് സിംഗ് സൈനി മുന്നറിയിപ്പ് നൽകി. വെറുപ്പുളവാക്കുന്ന ഈ നഗ്നമായ അസത്യപ്രചരണത്തിനെതിരെ അരവിന്ദ് കെജ്‌രിവാൾ ഹരിയാനയിലെയും ദെൽഹിയിലെയും ജനങ്ങളോട് ഉടൻ മാപ്പ് പറയണം. അല്ലെങ്കിൽ ഞങ്ങൾ അദ്ദേഹത്തിനെതിരെ മാനനഷ്ടക്കേസ് ഫയൽ ചെയ്യും, മുഖ്യമന്ത്രി സൈനി വാർത്ത ഏജൻസിയോട് പറഞ്ഞു. കെജ്‌രിവാൾ ദെൽഹിക്ക് ഒരു ദുരന്തമായി മാറിയെന്നും സംസ്ഥാനത്ത് നടക്കുന്ന നിയമസഭാ തിരഞ്ഞെടുപ്പിൽ ജനങ്ങളുടെ അനുഗ്രഹത്തോടെ ബിജെപി ദെൽഹിയെ ഈ ദുരന്തത്തിൽ നിന്ന് മോചിപ്പിക്കുമെന്നും മുഖ്യമന്ത്രി വ്യക്തമാക്കി. 10 വർഷമായി ശുദ്ധജലക്ഷാമം പരിഹരിക്കുന്നതിൽ പരാജയപ്പെട്ട അരവിന്ദ് കെജ്‌രിവാൾ സർക്കാർ അടിസ്ഥാനരഹിതമായ ആരോപണം ഉന്നയിക്കുകയാണ്. ആരോപണത്തിൽ അദ്ദേഹത്തിന്റെ ശീലവും ചിന്തയും ആണ് അടങ്ങിയിരിക്കുന്നത്. വിഷയത്തെക്കുറിച്ച് പരിശോധന നടത്താൻ ഞങ്ങൾ ചീഫ് സെക്രട്ടറിയെ അവിടേക്ക് അയക്കും. മുഖ്യമന്ത്രി സൈനി അറിയിച്ചു. അരവിന്ദ് കെജ്‌രിവാളിന്റെ ആരോപണത്തിനെതിരെ ഹരിയാന മന്ത്രി അനിൽ വിജും രംഗത്തെത്തി. ഹരിയാനയിലൂടെ ഒഴുകുന്ന യമുനാ നദിയിലെയും ദെൽഹിയിലെയും വെള്ളത്തിന്റെ ഗുണനിലവാരം പരിശോധിക്കുവാനും അദ്ദേഹം മാധ്യമപ്രവർത്തകരോട് ആവശ്യപ്പെട്ടു. നിങ്ങൾക്ക് അതിലെ വ്യത്യാസം കാണാൻ കഴിയും. ദെൽഹിയിലെ നദി വൃത്തിയാക്കുന്നത് ഞങ്ങളുടെ ജോലിയല്ല’ അത് അരവിന്ദ് കെജ്‌രിവാളിന്റെ ജോലിയാണ് അദ്ദേഹത്തിന് അത് നിർവഹിക്കാൻ കഴിഞ്ഞില്ല. അദ്ദേഹം ആരോപിച്ചു. വിഷയത്തിൽ തിരഞ്ഞെടുപ്പ് കമ്മീഷനും ഇടപെട്ടു. യമുന നദിയിലെ വെള്ളത്തിലെ അമോണിയയുടെ അളവ് സംബന്ധിച്ച് ഒരാഴ്‌ച്ചയ്‌ക്കകം വസ്തുതാപരമായ റിപ്പോർട്ട് സമർപ്പിക്കാൻ ഇലക്ഷൻ കമ്മീഷൻ ഹരിയാന സർക്കാരിനോട് ആവശ്യപ്പെട്ടു. ദെൽഹി ജൽ ബോർഡ് സിഇഒ ശില്‍പ്പ ഷെട്ടി അരവിന്ദ് കെജ്‌രിവാളിന്റെ ആരോപണം വസ്തുതാപരമായി ഒരു അടിസ്ഥാനവും ഇല്ലാത്തതും തെറ്റുമാണെന്നും ചൂണ്ടിക്കാട്ടി ദെൽഹി ചീഫ് സെക്രട്ടറിക്ക് കത്തെഴുതി. ഇത്തരം തെറ്റായ പ്രസ്താവനകൾ ദെൽഹി നിവാസികൾക്കിടയിൽ ഭയാശങ്കകൾ സൃഷ്ടിക്കുമെന്നും സംസ്ഥാനങ്ങൾ തമ്മിലുള്ള ബന്ധത്തെ പ്രതികൂലമായി ബാധിക്കുമെന്നും അവർ കത്തിൽ വ്യക്തമാക്കി. വിഷയം ലെഫ്റ്റ്നൻ്റ് ഗവർണറുടെ ശ്രദ്ധയിൽപ്പെടുത്താനും അവർ ചീഫ് സെക്രട്ടറിയോട് ആവശ്യപ്പെട്ടു.