തിരുവനന്തപുരം : ഷാരോണ് രാജ് വധക്കേസില് പ്രതി ഗ്രീഷ്മയ്ക്ക് വധശിക്ഷ വിധിച്ചതില് പുരുഷന്മാരുടെ സംഘടനയായ ഓള് കേരള മെന്സ് അസോസിയേഷന് (എകെഎംഎ)ആഹ്ലാദ പ്രകടനം സംഘടിപ്പിക്കുന്നു. കേസില് വിധി പറഞ്ഞ ജഡ്ജി എ എം ബഷീറിന്റെ കട്ടൗട്ടില് ബുധനാഴ്ച പാലഭിഷേകം നടത്തും.
പാലാഭിഷേകത്തിന് പുറമെ പടക്കം പൊട്ടിച്ചും അസോസിയേഷന് ആഘോഷം നടത്തും. രാവിലെ 11.30ന് സെക്രട്ടേറിയറ്റിന് മുന്നിലാണ് പരിപാടി. രാഹുല് ഈശ്വറാണ് ഉദ്ഘാടനം നിര്വഹിക്കുക. വിധിയെ എതിര്ത്ത റിട്ട. ഹൈക്കോടതി ജഡ്ജി ജസ്റ്റിസ് കെമാല് പാഷക്കെതിരെയുള്ള പ്രതിഷേധവും സംഘടിപ്പിക്കുമെന്ന് സംസ്ഥാന പ്രസിഡന്റ് വട്ടിയൂര്ക്കാവ് അജിത് കുമാര് അറിയിച്ചു.
ഷാരോണ് വധക്കേസില് നെയ്യാറ്റിന്കര അഡീഷണല് സെഷന്സ് കോടതി, പ്രതി ഗ്രീഷ്മയ്ക്ക് വധശിക്ഷ വിധിച്ചത് കഴിഞ്ഞ ദിവസമാണ്. ഷാരോണിന്റെ സ്നേഹത്തിലും വിശ്വാസത്തിലും വഞ്ചനകാട്ടി ഗ്രീഷ്മ നടത്തിയ കൊലപാതകം അപൂര്വങ്ങളില് അപൂര്വ്വമെന്ന് നിരീക്ഷിച്ചാണ് കോടതി ശിക്ഷവിധിച്ചത്.
വിവിധ വകുപ്പുകളിലായി ഗ്രീഷ്മയ്ക്ക് മൂന്നരലക്ഷം രൂപ പിഴയും ചുമത്തിയിട്ടുണ്ട്. തുക ഷാരോണിന്റെ മാതാപിതാക്കള്ക്ക് നല്കണം. മൂന്നാം പ്രതിയും ഗ്രീഷ്മയുടെ അമ്മാവനുമായ നിര്മലകുമാരന് നായര്ക്ക് തെളിവ്നശിപ്പിച്ച കുറ്റത്തിന് 3 വര്ഷം തടവും 50,000 രൂപ പിഴയും വിധിച്ചു.
