തിരുവനന്തപുരം: ലഭ്യമായ വിവരങ്ങള് അനുസരിച്ച് മൂന്ന് തരത്തിലുള്ള വൈറസുകളാകാം ചൈനയില് ഭീതി പടര്ത്തുന്ന രീതിയില് ശ്വാസകോശ അണുബാധകള്ക്ക് കാരണമെന്ന് സംസ്ഥാന ആരോഗ്യവകുപ്പ്. ഹ്യൂമന് മെറ്റാന്യൂമോ വൈറസ് , കോവിഡ് 19 ന്റെ ചില വകഭേദങ്ങള്, ഇന്ഫ്ലുവന്സ എ വൈറസ്ബാധകള് എന്നിവയാണ് അവ. മഹാമാരിയായി മാറത്തക്കവണ്ണം ഉള്ള ജനിതക വ്യതിയാനങ്ങള് ഇവയില് ഒന്നിലും തന്നെ സംഭവിച്ചതായി റിപ്പോര്ട്ടുകളില്ല.
മൂന്നുതരം വൈറസുകളില് ഹ്യൂമന് മെറ്റാന്യൂമോ വൈറസ് ആണ് താരതമ്യേന നമുക്ക് അപരിചിതമായ വൈറസ്. ഈ വൈറസിനെ കണ്ടെത്തിയത് 2001ല് മാത്രമാണെങ്കിലും കഴിഞ്ഞ 50 വര്ഷത്തില് കൂടുതലായി കേരളം ഉള്പ്പെടെ ലോകത്തിന്റ ഏതാണ്ട് എല്ലാ ഭാഗങ്ങളിലും, പ്രത്യേകിച്ചും കുട്ടികളില് ഈ വൈറസ് വ്യാപനം ഉണ്ടായിട്ടുണ്ട് . നമുക്ക് തന്നെ മുന്പ് വന്നുപോയ ജലദോഷപ്പനി ഈ വൈറസ് കാരണമാകാം. അതുകൊണ്ടുതന്നെ HMPV യെ അപകടകാരിയായ ഒരു പുതിയ വൈറസായി കാണാന് കഴിയില്ല. കേരളത്തിലും കുട്ടികളില് ഈ വൈറസ് കൊണ്ടുള്ള അണുബാധകളും ചില അവസരങ്ങളില് ന്യൂമോണിയകളും റിപ്പോര്ട്ട് ചെയ്തിട്ടുണ്ട്. നമ്മുടെ ഇന്സ്റ്റിറ്റ്യൂട്ട് ഓഫ് അഡ്വാന്സ്ഡ് വൈറോളജി, നാഷണല് ഇന്സ്റ്റിറ്റ്യൂട്ട് ഓഫ് വൈറോളജി, സ്റ്റേറ്റ് പബ്ലിക് ഹെല്ത്ത് ലാബ് തുടങ്ങിയ സ്ഥാപനങ്ങളില് ഈ രോഗം കണ്ടെത്താനുള്ള സംവിധാനങ്ങളും ഉണ്ട്. വൈറസില് കാര്യമായ ജനിതക വ്യതിയാനങ്ങള് സംഭവിച്ചിട്ടില്ല എങ്കില് HMPV വളരെയധികം ഭീതി വരുത്തുന്ന ഒരു സാഹചര്യം സൃഷ്ടിക്കാന് സാധ്യത കുറവാണ്. എങ്കിലും നമ്മുടെ നാട്ടില് പ്രത്യേകിച്ച് കുട്ടികളിലും പ്രായമായവരിലും കാണപ്പെടുന്ന ശ്വാസകോശ സംബന്ധമായ രോഗങ്ങള് കൃത്യമായി നിരീക്ഷിക്കേണ്ടതാണ്. അതാണ് നിലവില് നാം ചെയ്യുന്നത്.
രണ്ടാമത്തേത് കോവിഡ് 19 ന്റെ പുതിയ ജനിതക വ്യതിയാനങ്ങളാണ്. മറ്റൊരു മഹാമാരിയാകാന് സാധ്യത കല്പിക്കപ്പെടുന്ന വൈറസുകളില് കോവിഡ് 19 ന്റെ പുതിയ ജനിതക വ്യതിയാനങ്ങള്ക്ക് ഇപ്പോഴും പ്രാധാന്യമുണ്ട്. അതുകൊണ്ടുതന്നെ ചൈനയില് ചര്ച്ചചെയ്യപ്പെടുന്ന തരത്തില് ന്യൂമോണിയ രോഗം പടരുന്നുണ്ടെങ്കില്, അതിന് കാരണങ്ങളില് ഒന്ന് കോവിഡിന്റെ പുതിയ ജനിതകവ്യതിയാനങ്ങള് ആണെങ്കില് നാം കരുതിയിരിക്കണം. എങ്കിലും നേരത്തെ തന്നെ കോവിഡ് വന്നിട്ടുള്ള ആളുകള്ക്കും കോവിഡ് രോഗത്തിനെതിരെ വാക്സിന് സ്വീകരിച്ചിട്ടുള്ള ആളുകള്ക്കും പുതിയ ജനിതക വ്യതിയാനം അപകടകരമായ രോഗാവസ്ഥ ഉണ്ടാക്കാന് സാധ്യത കുറവാണ്. പക്ഷെ അണുബാധ പടരുന്ന സാഹചര്യം ഉണ്ടായാല് പ്രായമുള്ളവരെയും രോഗികളെയും അത് ബാധിക്കാന് സാധ്യതയുണ്ട്. ഇനിയും പൂര്ണമായി അപ്രത്യക്ഷമായിട്ടില്ലാത്ത കോവിഡ് 19 ജനിതക വ്യതിയാനങ്ങള് തിരിച്ചുവരുന്ന ഒരു സാഹചര്യം ഉണ്ടായാലും അതിനെ നേരിടാനും സംസ്ഥാനം സുസജ്ജമാണ്.
മേല്പ്പറഞ്ഞ വൈറസ് വിഭാഗങ്ങളില് മൂന്നാമത്തെത് ഇന്ഫ്ലുവന്സ എ എന്ന വിഭാഗത്തില്പ്പെടുന്ന, പ്രാഥമികമായി ജന്തുക്കളില് നിന്നോ പക്ഷികളില് നിന്നോ ഉത്ഭവിച്ച് പിന്നീട് മനുഷ്യരിലേക്ക് കടന്നെത്തുന്ന ഇന്ഫ്ലുവന്സ വിഭാഗത്തില് പെടുന്ന വൈറസ് ബാധകളാണ്. കേരളം ഇന്ന് ഏകാരോഗ്യ സമീപനത്തിലൂടെ നേരിടാന് ശ്രമിക്കുന്ന ഏറ്റവും പ്രധാനപ്പെട്ട രോഗങ്ങളുടെ ഒരു വിഭാഗമാണ് ഇന്ഫ്ലുവന്സ. മാത്രമല്ല, വിവിധങ്ങളായ വൈറസ് ബാധകളില് മഹാമാരികളാകാന് ഏറ്റവും സാധ്യത കല്പിക്കപ്പെടുന്നതും ഇന്ഫ്ലുന്സ വിഭാഗത്തില്പ്പെട്ട പനികള്ക്കാണ്. ചൈനയില് ഇപ്പോള് പൊട്ടപ്പുറപ്പെട്ടിരിക്കുന്ന രോഗാണുബാധയില് ഇന്ഫ്ലുവന്സ രോഗത്തിന് എത്രത്തോളം സ്വാധീനം ഉണ്ട്, ഉണ്ടെങ്കില് അത് ഏതുതരം ഇന്ഫ്ലുവന്സ ആണ് തുടങ്ങിയ കാര്യങ്ങള് പുറത്തു വരാനിരിക്കുന്നതേയുള്ളൂ. എങ്കിലും H1N1 പോലെ നിലവില് വ്യാപിച്ചുകൊണ്ടിരിക്കുന്ന ഇന്ഫ്ലുന്സ വൈറസില് അപകട സ്വഭാവമുള്ള പുത്തന് ജനിതക വ്യതിയാനങ്ങളോ പുത്തന് ഇന്ഫ്ലുവന്സ വൈറസ് തന്നെയോ കടന്നുവന്നതായി നിലവില് റിപ്പോര്ട്ടുകളില്ല. എങ്കിലും ഇന്ഫ്ലുവന്സാ രോഗങ്ങളുടെ നിരീക്ഷണ സംവിധാനവും നാം ശാക്തീകരിക്കുകയാണെന്ന് ആരോഗ്യവകുപ്പ് വ്യക്തമാക്കി.
