കൊച്ചി: കലൂര്‍ സ്‌റ്റേഡിയത്തില്‍ ഉമ തോമസ് എംഎല്‍എ അപകടത്തില്‍പ്പെട്ട നൃത്ത പരിപാടിയെ തുടര്‍ന്ന് രജിസ്റ്റര്‍ ചെയ്ത സാമ്പത്തിക തട്ടിപ്പ് കേസില്‍ അറസ്റ്റിലായ മൃദംഗ വിഷന്‍ എംഡി എം നിഗോഷ് കുമാറിന് ഇടക്കാല ജാമ്യം. ഏഴാം തീയതി വരെയാണ് ജാമ്യം നല്‍കിയത്. .കേസിലെ മറ്റു പ്രതികളായ ഷമീര്‍ അബ്ദുല്‍ റഹീം, ബെന്നി, കൃഷ്ണകുമാര്‍ എന്നിവര്‍ക്കും കോടതി ജാമ്യം നീട്ടി നല്‍കി.
നികോഷ് കുമാറിന് ഇടക്കാല ജാമ്യം അനുവദിച്ച ഹൈക്കോടതി 7 ന് ജാമ്യാപേക്ഷയില്‍ വിധി പറയും.സ്‌റ്റേജ് അശാസ്ത്രീയമായി നിര്‍മ്മിച്ചുവെന്നും സുരക്ഷ പാലിക്കാത്തത് അപകടമുണ്ടാക്കിയെന്നും പ്രോസിക്യൂഷന്‍ വാദിച്ചു.
മതിയായ വഴിയും കൈവരിയും ഇല്ലായിരുന്നു ഉപേക്ഷയോടും അശ്രദ്ധയോടും സ്‌റ്റേജ് നിര്‍മ്മിച്ചുവെന്നും 10 അടി താഴ്ചയില്‍ വീഴാനുള്ള എല്ലാ അവസരവും അവിടെ ഒരുക്കിയെന്നും പ്രോസിക്യൂഷന്‍ വാദിച്ചു.എന്നാല്‍ മതിയായ നീളവും വീതിയും സുരക്ഷയും ഉണ്ടായിരുന്നുവെന്നും പരിപാടിക്ക് മുന്‍പ് പൊലീസ് പരിശോധന നടത്തണമല്ലൊയെന്നും പ്രതിഭാഗം വാദമുയര്‍ത്തി.
വിഐപികള്‍ പങ്കെടുത്ത ചടങ്ങിന്റെ സുരക്ഷ പൊലീസ് പരിശോധിക്കേണ്ടതുണ്ട്. മന്ത്രിയും ഉന്നത പൊലീസ് ഉദ്യോഗസ്ഥരും അവിടെ ഉണ്ടായിരുന്നു. 308ാം വകുപ്പ് ചുമത്തേണ്ട ഒരു കാര്യവും ഇല്ല. പ്രശ്‌നം ഉണ്ടെങ്കില്‍ പൊലീസ് പറയണമെന്നും അപകടം നടന്നിട്ട് തങ്ങളെ മാത്രം കുറ്റപ്പെടുത്തുന്നത് ശരിയല്ലെന്നുമായിരുന്നു പ്രതിഭാഗത്തിന്റെ വാദം.
