ന്യൂദല്‍ഹി: രാജ്യത്തെ കോടിക്കണക്കിന് വിദ്യാര്‍ത്ഥികള്‍ക്ക് ‘ഒരു രാജ്യം, ഒരു സബ്‌സ്‌ക്രിപ്ഷന്‍’ പദ്ധതിയുമായി കേന്ദ്രം. ഉന്നത വിദ്യാഭ്യാസ സ്ഥാപനങ്ങളിലെ വിദ്യാര്‍ത്ഥികള്‍ക്ക് ലോകമെമ്പാടുമുള്ള ഒന്നാം നിര ജേണലുകളിലെ ഗവേഷണ ലേഖനങ്ങള്‍ ഉള്‍പ്പെടെയുള്ളവ ലഭ്യമാക്കാനുള്ള പദ്ധതിയാണിത്. പദ്ധതിക്ക് നവംബറില്‍ കേന്ദ്രമന്ത്രിസഭ അംഗീകാരം നല്‍കിയിരുന്നു. പദ്ധതിക്കായി 6,000 കോടി രൂപയാണ് കേന്ദ്രസര്‍ക്കാര്‍ മാറ്റിവച്ചിട്ടുള്ളത്.
സര്‍ക്കാര്‍ ധനസഹായം നല്‍കുന്ന ഉന്നത വിദ്യാഭ്യാസ സ്ഥാപനങ്ങള്‍, സര്‍വകലാശാലകള്‍, ഐഐടികള്‍ എന്നിവിടങ്ങളിലെ 1.8 കോടിയിലേറെ വിദ്യാര്‍ത്ഥികള്‍ക്കും അദ്ധ്യാപകര്‍ക്കും ഇതിന്റെ പ്രയോജനം ലഭിക്കും.
30 പ്രമുഖ രാജ്യന്തര ജേണല്‍ പ്രസാധകരുടെ 13,000- ത്തോളം വരുന്ന ഇ-ജേണലുകള്‍, കേന്ദ്ര- സംസ്ഥാന സര്‍ക്കാരുകളുടെ നിയന്ത്രണത്തിലുള്ള 6,300-ലേറെ ഉന്നത വിദ്യാഭ്യാസ സ്ഥാപനങ്ങള്‍ക്കും ഗവേഷണ സ്ഥാപനങ്ങള്‍ക്കും ലഭ്യമാകുന്നതാണ് വണ്‍ നേഷന്‍ വണ്‍ സബ്‌സ്‌ക്രിപ്ഷന്‍ പദ്ധതി.
യുജിസിയിലെ ഇന്‍ഫര്‍മേഷന്‍ ആന്‍ഡ് ലൈബ്രറി നെറ്റ്‌വര്‍ക്ക് ആണ് ഇത് ഏകോപിപ്പിക്കുന്നത്. വണ്‍ നേഷന്‍ വണ്‍ സബ്‌സ്‌ക്രിപ്ഷന്‍ പോര്‍ട്ടല്‍ വഴി സ്ഥാപനങ്ങള്‍ക്ക് ജേണലുകള്‍ എടുക്കാം. ഇതിലൂടെ വിവിധ പ്രസാധകരില്‍ നിന്ന് വിവിധ തരത്തിലുള്ള ജേണലുകള്‍ വാങ്ങുന്ന സാഹചര്യം ഒഴിവാക്കാം. ഒരൊറ്റ സബ്‌സ്‌ക്രിപ്ഷനിലൂടെ അംഗസ്ഥാപനങ്ങള്‍ക്ക് ജേണലുകള്‍ ലഭ്യമാകും. മാത്രമല്ല ജേണലുകള്‍ വാങ്ങാനുള്ള തുകയിലും ഗണ്യമായ കുറവ് വരികയും ചെയ്യും.
