കൊച്ചി: പുത്തന്‍ പ്രതീക്ഷകളുമായി പുതുവര്‍ഷത്തെ സ്വാഗതം ചെയ്ത് ജനങ്ങള്‍. ലോകരാജ്യങ്ങള്‍ക്കൊപ്പം മലയാളികളും തിമിര്‍ത്ത് ആഘോഷിക്കുകയാണ്.
ചൊവ്വാഴ്ച രാത്രി പ്രായഭേദമന്യേ പാട്ടുപാടിയും നൃത്തം ചെയ്തും ആളുകള്‍ ആഘോഷിക്കുകയാണ്. ഫോര്‍ട്ട് കൊച്ചിയില്‍ ജനസാഗരമാണ്.
കോഴിക്കോടും തിരുവനന്തപുരത്തുമൊക്കെ ആഘോഷം പൊടിപൊടിക്കുകയാണ്. തിരുവനന്തപുരത്ത് കനകക്കുന്നിലും മാനവീയം വീഥിയിലും കോവളത്തും വര്‍ക്കല പാപനാശത്തും ആഘോഷപരിപാടികള്‍ നടക്കുന്നു. കോഴിക്കോട് കടപ്പുറത്തും ആഘോഷത്തിമിര്‍പ്പാണ്.
മറ്റ് ജില്ലകളിലും വിവിധ കേന്ദ്രങ്ങളില്‍ ആഘോഷപരിപാടികള്‍ ഉണ്ട്. പുലര്‍ച്ചെ വരെ പരിപാടികള്‍ നടക്കും. എല്ലായിടത്തും പൊലീസ് ജാഗ്രത പാലിക്കുന്നുണ്ട്.
