ന്യൂദൽഹി : പുഷ്പ 2 റിലീസിനിടെയുണ്ടായ തിക്കിലും തിരക്കിലും പെട്ട് യുവതി മരിച്ച സംഭവത്തില് നടന് അല്ലു അര്ജുനെ പിന്തുണച്ച് മുൻ കേന്ദ്രമന്ത്രിയും ബിജെപി എംപിയുമായ അനുരാഗ് താക്കൂര്. ലോകസിനിമാ ഭൂപടത്തിലേക്ക് ഇന്ത്യന് സിനിമയെ കൊണ്ടെത്തിച്ചവരാണ് തെലുങ്ക് സിനിമയും നടന്മാരും. അത്രയും ഉന്നതിയില് നില്ക്കുന്ന വ്യവസായത്തെ ഇല്ലാതാക്കാനാണ് ചിലരുടെ ശ്രമം എന്നാണ് അനുരാഗ് താക്കൂർ പറഞ്ഞു.
തെലങ്കാന പോലീസ് അല്ലുവിനെതിരെ കേസെടുക്കുകയും അറസ്റ്റ് ചെയ്യുകയും ചെയ്തിരുന്നു. കഴിഞ്ഞ ദിവസം രണ്ടര മണിക്കൂറോളം സമയം പോലീസ് നടനെ ചോദ്യംചെയ്തിരുന്നു. ഈ പശ്ചാത്തലത്തിലാണ് അനുരാഗ് താക്കൂറിന്റെ പ്രതികരണം.
“കഴിഞ്ഞ ഏതാനും വര്ഷങ്ങള് തന്നെ എടുത്തുനോക്കിയാലറിയാം, അല്ലു അര്ജുന് ഇന്ത്യന് സിനിമയ്ക്ക് നല്കിയ സംഭാവനകള്. പുഷ്പ സിനിമയിലൂടെ അല്ലു ദേശീയ അവാര്ഡ് നേടി. ലോകസിനിമയും രാജ്യവും അംഗീകരിച്ച നടനാണ് ചിരഞ്ജീവി. ആര്ആര്ആര്, പുഷ്പ, ബാഹുബലി, കെജിഎഫ് ഇവയെല്ലാം ഇന്ത്യന് സിനിമയുടെ പേരിന് തിളക്കം കൂട്ടിയവയാണ്. വിവാദങ്ങള് സൃഷ്ടിക്കുന്നതിനു പകരം കാര്യങ്ങള് സംസാരിച്ചു തീര്ക്കണം, സിനിമകൊണ്ട് രാഷ്ട്രീയം കളിക്കരുത്” – അനുരാഗ് താക്കൂര് പറഞ്ഞു.
