പട്ടാഴി: എല്ഡിഎഫ് ഭരണത്തില് കുടിലുകള്ക്കും പാവപ്പെട്ടവര്ക്കും ആയിരങ്ങള് കെട്ടിടനികുതി വാങ്ങുമ്പോള് കേരള കോണ്ഗ്രസ് (ബി) വനിതാ വിഭാഗം സംസ്ഥാന
പ്രസിഡന്റ് മഞ്ജു റഹീമിന്റെ ആഢംബര വീടിന് നികുതി വെറും 38രൂപ. 3000ത്തിലധികം സ്ക്വയര്ഫീറ്റിലാണ് വീട് നിര്മിച്ചിരിക്കുന്നത്. ദിവസങ്ങള്ക്ക് മുമ്പാണ് ഇവരുടെ 2024 വര്ഷത്തെ കരമടച്ച രസീതില് 38 രൂപ മാത്രം ഒടുക്കിയതിന്റെ വിവരങ്ങള് സാമൂഹ്യമാധ്യമങ്ങളില് പ്രചരിച്ചത്.
നികുതിവെട്ടിപ്പില് പ്രതിഷേധിച്ച് പട്ടാഴി ഗ്രാമപഞ്ചായത്തിലേക്ക് ബിജെപി പ്രതിഷേധ മാര്ച്ചും ധര്ണയും നടത്തി. പട്ടാഴി ഗ്രാമപഞ്ചായത്തിന് ഭിക്ഷചട്ടി നല്കിയാണ് പ്രതിഷേധിച്ചത്. ധര്ണ ബിജെപി പത്തനാപുരം മണ്ഡലം പ്രസിഡന്റ് എ.ആര്. അരുണ് ഉദ്ഘാടനം ചെയ്തു.
ഉദ്യോഗസ്ഥരുടെ മുകളില് അഴിമതി ആരോപിച്ച് രക്ഷപ്പെടാനാണ് ഭരണസമിതിയുടെ ശ്രമമെന്ന് അരുണ് പറഞ്ഞു. കര്ഷകമോര്ച്ച സംസ്ഥാന ഉപാധ്യക്ഷന് സുഭാഷ് പട്ടാഴി മുഖ്യപ്രഭാഷണം നടത്തി.
കഴിഞ്ഞ അഞ്ചുവര്ഷമായി ആഢംബര വീടിന് വെറും 38 രൂപ മാത്രം നികുതിയടച്ച് ഗ്രാമപഞ്ചായത്തിന്റെ തനത് ഫണ്ടില് വെട്ടിപ്പ് നടത്തിയിട്ട് കുറ്റം പഞ്ചായത്ത് ഉദ്യോഗ
സ്ഥരുടെ മുകളില് ചാര്ത്തുകയാണ്. കേരള കോണ്ഗ്രസ് നേതാവിന്റെ അഴിമതി നാടിന് തന്നെ നാണക്കേടാണെന്ന് അദ്ദേഹം പറഞ്ഞു.
പഞ്ചായത്ത് സമിതി പ്രസിഡന്റ് ജി. മനോജ് കുമാര് അധ്യക്ഷത വഹിച്ച നേതാക്കളായ രതീഷ് കോളൂര്, ബിജെപി പട്ടാഴി പഞ്ചായത്ത് സമിതി ജനറല് സെക്രട്ടറി രാജീവന് പിള്ള, വിജേഷ് കുമാര്, രഞ്ജിത രതീഷ്, പ്രീത കുമാരി തുടങ്ങിയവര് പങ്കെടുത്തു.
