കൊച്ചി: മത സംവരണം നല്കാനാവില്ലെന്ന സുപ്രീംകോടതിയുടെ നിരീക്ഷണത്തെ സ്വാഗതം ചെയ്യുന്നതായി വിശ്വഹിന്ദു പരിഷത്ത് സംസ്ഥാന പ്രസിഡന്റ് വിജി തമ്പി ജനറല് സെക്രട്ടറി വി.ആര്. രാജശേഖരന് എന്നിവര് വാര്ത്താ കുറിപ്പില് പറഞ്ഞു. സംവരണം മതങ്ങള്ക്കല്ല നല്കേണ്ടതെന്ന നിലപാടാണ് വിശ്വഹിന്ദു പരിഷത്തിന് തുടക്കം മുതലേ ഉള്ളത്.
രാഷ്ട്രീയ ലാഭത്തിനുവേണ്ടി ഭരണഘടന അനുശാസിക്കുന്ന സംവരണ നയങ്ങളില് വെള്ളം ചേര്ത്ത നടപടി അംഗീകരിക്കാന് കഴിയില്ല. സംവരണം ഹിന്ദു സമൂഹത്തിലെ പിന്നാക്ക വിഭാഗങ്ങള്ക്ക് നിലനിര്ത്താനുള്ള നടപടികള് തുടരണം. മുസ്ലിം, പരിവര്ത്തിത ക്രൈസ്തവ വിഭാഗങ്ങളിലുള്ളവര്ക്ക് സംവരണം നല്കുന്ന നടപടി അടിയന്തരമായി അവസാനിപ്പിക്കണം. ഡോ.ബി.ആര്. അംബേദ്കറുടെ നേതൃത്വത്തില് രൂപം കൊടുത്ത ഭാരതത്തിന്റെ ഭരണഘടനാതത്വങ്ങള്ക്ക് ഈ നയം എതിരാണ്. മതത്തിന്റെ അടിസ്ഥാനത്തില് സംവരണം നല്കാനാവില്ലെന്ന് സുപ്രീം കോടതിയും നിരീക്ഷിച്ച സാഹചര്യത്തില് ഇനിയും മതപരമായ സംവരണ ആനുകൂല്യങ്ങള് തുടരരുതെന്നും വിഎച്ച്പി നേതാക്കള് ആവശ്യപ്പെട്ടു.
കേരളത്തില് മുസ്ലിങ്ങള്ക്ക് 12 ശതമാനവും ക്രിസ്ത്യാനികള്ക്ക് ആറ് ശതമാനവും സംവരണം ഒബിസിയില് ഉള്പ്പെടുത്തി നല്കിവരുന്നതും അടിയന്തരമായി അവസാനിപ്പിക്കണം. അവര്ക്ക് അര്ഹതപ്പെട്ടത് ഇഡബ്ല്യുഎസ് സംവരണം ആണ്. ജാതി സംവരണത്തിന് അര്ഹര് ഹിന്ദു വിശ്വാസികള് മാത്രമാണെന്നും വിഎച്ച്പി നേതാക്കള് വ്യക്തമാക്കി.
