ന്യൂദല്ഹി: ആനിമേറ്റഡ് ചിത്രമായ ‘മഹാപ്രഭു ജഗന്നാഥി’ന്റെ റിലീസ് ജഗന്നാഥ രഥയാത്ര ആഘോഷങ്ങളുടെ സമാപനത്തിനുശേഷം മതിയെന്ന് സുപ്രീം കോടതി. രഥയാത്രയ്ക്കിടെ ചിത്രം റിലീസ് ചെയ്യുന്നത് മതവികാരം വ്രണപ്പെടുത്താമെന്നും ക്രമസമാധാന നില തകരാന് ഇടയാക്കാമെന്നും ചൂണ്ടിക്കാട്ടി ഇന്ന് നടത്താനിരുന്ന ചിത്രത്തിന്റെ രാജ്യവ്യാപക റിലീസ് തടഞ്ഞുകൊണ്ട് ഒറീസ ഹൈക്കോടതി ഇടക്കാല ഉത്തരവിറക്കിയിരുന്നു. ഇതിനെതിരെ നിര്മ്മാതാക്കള് നല്കിയ അപ്പീലിലാണ് സുപ്രീം കോടതി ഉത്തരവ്.
രഥയാത്ര ജൂലായ് 27 വരെ തുടരും. അതിനാലാണ് 28നോ അതിനുശേഷമോ ചിത്രം പ്രദര്ശിപ്പിക്കാന് ജസ്റ്റിസുമാരായ ബി.വി. നാഗരത്ന , ആര്. മഹാദേവന് എന്നിവരടങ്ങിയ ബെഞ്ച് ബെഞ്ച് അനുമതി നല്കിയത്.
ചിത്രത്തിന്റെ ടീസര് പുറത്തിറങ്ങിയതോടെ ശ്രീ ജഗന്നാഥ ക്ഷേത്ര ഭരണസമിതി ചില ഭാഗങ്ങളില് എതിര്പ്പ് പ്രകടിപ്പിച്ചിരുന്നു. ഭരണസമിതി നിര്ദേശിച്ച ഭേദഗതി കൂടാതെയാണ് റിലീസിന് ശ്രമിച്ചത്. ഇതേത്തുടര്ന്നാണ് കോടതിയെ സമീപിച്ചത്.
