ന്യൂഡൽഹി: കാമുകനൊപ്പം പോകാൻ അഞ്ച് വയസുകാരിയായ മകളെ കൊലപ്പെടുത്തിയ അമ്മ അറസ്റ്റിൽ .ഡൽഹിയിലെ അശോക് വിഹാറിലാണ് സംഭവം . ആദ്യ ഭർത്താവ് ഉപേക്ഷിച്ച ശേഷം, യുവതി ഇൻസ്റ്റാഗ്രാമിൽ രാഹുൽ എന്നയാളുമായി പരിചയപ്പെടുകയും സൗഹൃദത്തിലാകുകയും ചെയ്തു. ഇതിന് പിന്നാലെയാണ് ഇൻസ്റ്റാഗ്രാം സുഹൃത്തിനെ വിവാഹം കഴിക്കാൻ ഡൽഹിയിലേക്ക് പോകാൻ യുവതി തീരുമാനിച്ചത്.
എന്നാൽ ഇയാളും കുടുംബവും അവളുടെ കുട്ടിയെ സ്വീകരിക്കാൻ തയ്യാറായില്ല. ഇതിനെ തുടർന്ന് യുവതി കുഞ്ഞിനെ കഴുത്ത് ഞെരിച്ച് കൊലപ്പെടുത്തുകയായിരുന്നു . കുഞ്ഞിന് അനക്കമില്ലാത്തത് കണ്ട ബന്ധുക്കളാണ് ആശുപത്രിയിൽ എത്തിച്ചത് . മരണം സ്ഥിരീകരിച്ച ഡോക്ടർമാരാണ് വിവരം പൊലീസിൽ അറിയിച്ചത്.പോലീസ് പരിശോധനയിൽ കുട്ടിയുടെ കഴുത്തിൽ വിരൽ പാടുകൾ കണ്ടെത്തി.
തുടർന്ന് കുട്ടിയുടെ അമ്മയെയും മറ്റ് ബന്ധുക്കളെയും ചോദ്യം ചെയ്യാൻ വിളിപ്പിച്ചു. വിശദമായ ചോദ്യം ചെയ്യലിൽ മകളെ കഴുത്ത് ഞെരിച്ച് കൊലപ്പെടുത്തിയതായി യുവതി സമ്മതിക്കുകയായിരുന്നു . തുടർന്ന് യുവതിയെ പോലീസ് അറസ്റ്റ് ചെയ്തു . കാമുകനും സംഭവത്തിൽ പങ്കുണ്ടോയെന്ന് അന്വേഷിക്കുമെന്ന് പോലീസ് പറഞ്ഞു.
