റിയാദ്: കൊലപാതക കേസില് ശിക്ഷിക്കപ്പെട്ട് സൗദി അറേബിയയില് ജയിലില് കഴിയുന്ന അബ്ദുല് റഹീമിന്റെ മോചനം വൈകും. കേസില് ഞായറാഴ്ച മോചന ഉത്തരവ് ഉണ്ടായില്ല. കേസ് വീണ്ടും പരിഗണിക്കാന് മാറ്റി. രണ്ടാഴ്ച കഴിഞ്ഞു വീണ്ടും പരിഗണിച്ചേക്കും.
പബ്ലിക് പ്രോസിക്യൂഷന് അടക്കം വകുപ്പുകളില് നടപടിക്രമങ്ങള് പൂര്ത്തിയായതിനാല് ഞായറാഴ്ച മോചന ഉത്തരവ് ഉണ്ടാകുമെന്ന പ്രതീക്ഷയിലായിരുന്നു.അബ്ദുല് റഹീമിന്റെ വധശിക്ഷ കോടതി റദ്ദ് ചെയ്തിരുന്നു.കൊല്ലപ്പെട്ട ആളുടെ വീട്ടുകാര്ക്ക് നല്കേണ്ട ബ്ലഡ് മണിയുടെ ചെക്കും രേഖകളും കോടതിയിലെത്തിച്ചതോടെ മോചനത്തിനായുള്ള നടപടിക്രമങ്ങളെല്ലാം പൂര്ത്തിയായിരുന്നു. തുടര്ന്നാണ് വധശിക്ഷ റദ്ദ് ചെയ്ത് വിധിയെത്തിയത്.
റഹീമിന്റെ മോചനത്തിനായി 47 കോടി 87 ലക്ഷത്തി 65,347 രൂപയാണ് ആകെ സമാഹരിച്ചതെന്ന് നേരത്തേ നിയമ സഹായ സമിതി അറിയിച്ചു. കോഴിക്കോട് നടത്തിയ വാര്ത്താസമ്മേളനത്തിലാണ് സമിതി കണക്ക് പുറത്തുവിട്ടത്.
ദിയ ധനം ഉള്പ്പെടെയുള്ള ചെലവ് 36 കോടി 27 ലക്ഷത്തി 34,927 രൂപയാണ്. ബാക്കി 11 കോടി 60 ലക്ഷത്തി 30,420 രൂപ ട്രസ്റ്റ് അക്കൗണ്ടില് ഉണ്ട്. സമാഹരിച്ച ഫണ്ടില് ബാക്കിയുള്ള പതിനൊന്നരക്കോടി രൂപ മറ്റ് ജീവകാരുണ്യ പ്രവര്ത്തനങ്ങള്ക്ക് ഉപയോഗിക്കാന് ധാരണയായിട്ടുണ്ട്. റഹീമിന്റെ അഭിപ്രായം കൂടി കേട്ട ശേഷമാകും അന്തിമ തീരുമാനമെടുക്കുകയെന്നും നിയമ സഹായ സമിതി വ്യക്തമാക്കി.
