കൊൽക്കത്ത : ഭർത്താവ് തന്റെ നഗ്ന വീഡിയോകൾ വിൽക്കുന്നതായി ഭാര്യയുടെ പരാതി.പശ്ചിമ ബംഗാൾ സ്വദേശിനിയാണ് ഭർത്താവിനെതിരെ ഗുരുതര ആരോപണങ്ങളുമായി രംഗത്ത് എത്തിയത് . ഭർത്താവ് തന്റെ അശ്ലീല വീഡിയോകൾ നിർമ്മിച്ച് ബംഗ്ലാദേശിൽ വിൽക്കുന്നുവെന്നും , പരപുരുഷ ബന്ധത്തിന് നിർബന്ധിക്കുന്നുവെന്നും യുവതി പരാതിയിൽ പറയുന്നു. യുവതിയുടെ പരാതിയിൽ ഹൈക്കോടതി പോലീസ് അന്വേഷണത്തിന് ഉത്തരവിടുകയും ചെയ്തു.
ഒരു വർഷം മുമ്പ് ഹൗറയിലെ സങ്ക്രെയിൽ ഏരിയയിൽ വച്ചാണ് തന്റെ വിവാഹം നടന്നതെന്ന് യുവതി പറയുന്നു . ഭർത്താവ് തയ്യൽതൊഴിലാളിയായിരുന്നു . വിവാഹശേഷം സ്ത്രീധനത്തിന്റെ പേരിൽ ഇയാൾ യുവതിയെ മർദിക്കാൻ തുടങ്ങി. ഇതിന് പിന്നാലെയാണ് ഭാര്യയുടെ അശ്ലീല വീഡിയോകൾ ഉണ്ടാക്കി ബംഗ്ലാദേശിൽ വിൽക്കാൻ തുടങ്ങിയത് . തുടർന്ന് ബംഗാളിൽ നിന്നും ബംഗ്ലാദേശിൽ നിന്നുമുള്ള നിരവധി യുവാക്കളുമായി ബന്ധം സ്ഥാപിക്കാൻ നിർബന്ധിച്ചു . തന്നെ കാട്ടി മറ്റുള്ളവരിൽ നിന്ന് ഭർത്താവ് വൻതുക തട്ടിയെടുക്കാറുണ്ടായിരുന്നു.ഭർതൃവീട്ടുകാരും ഇതിന് കൂട്ടുനിന്നു. തുടർന്ന് യുവതി പോലീസിൽ പരാതി നൽകി.
എന്നാൽ ഇതിൽ നടപടി ഉണ്ടാകാത്തതിനെ തുടർന്ന് അഭിഭാഷകന്റെ സഹായത്തോടെ യുവതി ഹൈക്കോടതിയിൽ ഹർജി നൽകി. തുടർന്ന് കേസ് പരിഗണിച്ച ഹൈക്കോടതി പോലീസിനെ ശാസിച്ചു. ഇത്രയും വലിയ വിഷയത്തിൽ എന്തുകൊണ്ടാണ് നിങ്ങൾ ഗൗരവം കാണിക്കാത്തതെന്ന് ജസ്റ്റിസ് തീർത്ഥങ്കർ ഘോഷ് ചോദിച്ചു . പിന്നാലെ തുടർന്ന് പോലീസ് ഗൗരവമായി കേസ് അന്വേഷിക്കാനും ജഡ്ജി ഉത്തരവിട്ടു.
