കോട്ടയ്ക്കല്: വൈദ്യശാസ്ത്രത്തിന്റെ ഉദ്ഗ്രഥനം വര്‍ത്തമാനകാലത്തിന്റെ ആവശ്യകതയാണെന്ന് കേന്ദ്ര ആയുഷ് മന്ത്രാലയം സെക്രട്ടറി ഡോ. രാജേഷ് കൊട്ടേച്ച. വിവിധ വൈദ്യശാസ്ത്രശാഖകള്‍ കൈകാര്യം ചെയ്യുന്ന ഡോക്ടര്‍മാര്‍ ഒന്നിച്ചിരിക്കുകയും ആശയങ്ങള്‍ കൈമാറുകയും അതുവഴി ആരോഗ്യസംക്ഷണ മേഖലയില്‍ പുതിയ ഉണര്‍വുകള്‍ സൃഷ്ടിക്കുകയും ചെയ്യേണ്ടതുണ്ടെന്നും അദ്ദേഹം പറഞ്ഞു.
കോട്ടയ്ക്കല് ആര്യവൈദ്യശാല സംഘടിപ്പിച്ച അറുപത്തിഒന്നാമത് ആയുര്‍വേദ സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. ആര്യവൈദ്യശാല മാനേജിങ് ട്രസ്റ്റിയും ചീഫ് ഫിസിഷ്യനുമായ ഡോ. പി.എം. വാരിയര്‍ അധ്യക്ഷത വഹിച്ചു.
സംസ്ഥാന വ്യവസായവകുപ്പ് പ്രിന്‍സിപ്പല്‍ സെക്രട്ടറി എ.പി.എം. മുഹമ്മദ് ഹനീഷ് മുഖ്യപ്രഭാഷണം നടത്തി. ഡോ. പ്രവീണ്‍ ബാലകൃഷ്ണന്‍ രചിച്ച ‘ന്യൂ ട്രെന്‍ഡ്‌സ് ഇന്‍ പഞ്ചകര്‍മ്മ ടെക്‌നിക്‌സ്’ എന്ന ഗ്രന്ഥത്തിന്റെ പ്രകാശനം മുഹമ്മദ് ഹനീഷിന് നല്കി ഡോ. രാജേഷ് കൊട്ടേച്ച നിര്‍വഹിച്ചു. ആര്യവൈദ്യശാല ചീഫ് എക്‌സിക്യുട്ടീവ് ഓഫീസര്‍ കെ. ഹരികുമാര്‍, ആര്യവൈദ്യശാല ചാരിറ്റബിള്‍ ഹോസ്പിറ്റല്‍ സൂപ്രണ്ട് ഡോ. ലേഖ എന്നിവര്‍ സംസാരിച്ചു.
കോഴിക്കോട് മൈത്ര ഹോസ്പിറ്റല്‍ ആന്ത്രോപ്ലാസ്റ്റി ആന്‍ഡ് ആന്ത്രോസ്‌കോപ്പി ഹെഡും ഓഫ് സീനിയര്‍ കണ്‍സള്‍ട്ടന്റുമായ ഡോ. സമീര്‍ അലി പറവത്ത്, മുവാറ്റുപുഴ വെട്ടുകാട്ടില്‍ ആയുര്‍വേദ ഹോസ്പിറ്റല്‍ ഓര്‍ത്തോപീഡിക് ആന്‍ഡ് പ്രോക്‌ടോളജി ചീഫ് കണ്‍സള്‍ട്ടന്റ് ഡോ. ജിക്കു ഏലിയാസ് ബെന്നി, ആര്യവൈദ്യശാല ചീഫ് മെഡിക്കല്‍ ഓഫീസര്‍ ഡോ.നിഷാന്ത് നാരായണന്‍ തുടങ്ങിയവര്‍ പ്രബന്ധം അവതരിപ്പിച്ചു. ഒല്ലൂര്‍ വൈദ്യരത്‌നം ആയുര്‍വ്വേദ കോളേജ് റിട്ടയേര്‍ഡ് പ്രൊഫസര്‍ ഡോ. ടി. ശ്രീകുമാര്‍ മോഡറേറ്റര്‍ ആയിരുന്നു. പുരസ്‌കാരജേതാക്കള്‍ക്ക് ആര്യവൈദ്യശാല മാനേജിങ് ട്രസ്റ്റിയും ചീഫ് ഫിസിഷ്യനുമായ ഡോ. പി.എം. വാരിയര്‍ സമ്മാനങ്ങള്‍ നല്കി.
