കണ്ണൂര്‍; എഡിഎം നവീന്‍ ബാബുവിന്റെ മരണവുമായി ബന്ധപ്പെട്ട കേസില്‍ ജാമ്യം ലഭിച്ച ജില്ലാ പഞ്ചായത്ത് മുന്‍ പ്രസിഡന്റ് പി പി ദിവ്യ ജയിലിന് പുറത്തിറങ്ങി. നവീന്‍ ബാബുവിന്റെ മരണത്തില്‍ അങ്ങേയറ്റം ദുഃഖമുണ്ടെന്ന് പറഞ്ഞ ദിവ്യ കേസില്‍ തന്റെ നിരപരാധിത്വം തെളിയിക്കുമെന്നും ജയിലില്‍ നിന്ന് ഇറങ്ങിയ ശേഷം മാധ്യമങ്ങളോട് പ്രതികരിച്ചു. നവീന്‍ ബാബുവിന്റെ മരണ ശേഷം ആദ്യമായാണ് ദിവ്യ വിഷയത്തില്‍ മാധ്യമങ്ങളോട് സംസാരിക്കുന്നത്.
നിയമത്തില്‍ ഇപ്പോഴും വിശ്വാസമുണ്ട്. മാധ്യമങ്ങള്‍ ഉള്‍പ്പെടെ പൊതുപ്രവര്‍ത്തന രംഗത്ത് തന്നെ കാണാന്‍ തുടങ്ങിയിട്ട് രണ്ട് പതിറ്റാണ്ടായി. 14 വര്‍ഷക്കാലം ജനപ്രതിനിധിയായിരുന്നു. വ്യത്യസത രാഷ്‌ട്രീയ പാര്‍ട്ടിയില്‍ പെട്ടവര്‍ ഉള്‍പ്പെടെയുളളവരോട് സഹകരിച്ച് പോകുന്ന ആളാണ് താനെന്നും ദിവ്യ പറഞ്ഞു. സദുദ്ദേശപരമായാണ് എപ്പോഴും സംസാരിക്കാറുളളത്.
നവീന്‍ ബാബുവിന്റെ കുടുംബം ആഗ്രഹിക്കും പോലെ കൃത്യമായ അന്വേഷണം നടക്കണമെന്നാണ് തന്റെയും ആഗ്രഹം. അതിലൂടെ തന്റെ നിരപരാധിത്വം തെളിയിക്കാനാകുമെന്ന് വിശ്വസിക്കുന്നതായും ദിവ്യ പറഞ്ഞു.
സ്ത്രീയെന്ന പരിഗണന നല്‍കിയാണ് തലശേരി പ്രിന്‍സിപ്പല്‍ സെഷന്‍സ് കോടതി ദിവ്യയ്‌ക്ക് ജാമ്യം അനുവദിച്ചത്. പ്രതിക്ക് സ്വഭാവിക മനുഷ്യവകാശം നല്‍കാമെന്ന് ഉത്തരവില്‍ കോടതി പറയുന്നു. ദിവ്യയുടെ ആരോഗ്യസ്ഥിതിയും പിതാവിന്റെ രോഗാവസ്ഥയും പരിഗണിക്കുന്നതായി കോടതി ഉത്തരവില്‍ പറയുന്നു.
പ്രതിക്കെതിരായ പൊതുവികാരം ജാമ്യം നല്‍കുന്നതിന് തടയാന്‍ മതിയായ കാരണമല്ലെന്ന് കോടതി വ്യക്തമാക്കി.
