തുടക്കം മുതല്‍ അവസാനം വരെ മലയാളി പ്രേക്ഷകരെ ഏറെ ചിരിപ്പിച്ച സിനിമയാണ് “മാന്നാര്‍ മത്തായി സ്പീക്കിംഗ്”. നടി വാണി വിശ്വനാഥ് മലയാളത്തിലേക്ക് അരങ്ങേറ്റം കുറിച്ച സിനിമ കൂടിയാണിത്. മലയാള നടിമാർക്കിടയിൽ എന്നും വലിയ സ്ഥാനം വാണി വിശ്വനാഥിന് ലഭിച്ചിട്ടുണ്ട്. മലയാളത്തിൽ ആക്ഷൻ നായികയാണ് വാണി വിശ്വനാഥിനെ പ്രേക്ഷകർ കാണുന്നത്.
നായകൻമാരിൽ സുരേഷ് ഗോപിക്കുള്ള മാസ് ഇമേജ് നായികമാരിൽ ലഭിച്ചത് വാണി വിശ്വനാഥിനാണ്. നായകന് ഒപ്പത്തിനൊപ്പം നിൽക്കുന്ന കഥാപാത്രങ്ങൾ വാണിക്ക് ലഭിച്ചു. നടൻ ബാബുരാജിനെ വിവാഹം ചെയ്ത ശേഷമാണ് വാണി വിശ്വനാഥ് കരിയറിൽ സജീവമല്ലാതായത്. മറ്റ് ഭാഷകളിൽ ഇടയ്‌ക്ക് സിനിമകൾ ചെയ്‌തപ്പോഴും മലയാളത്തിൽ സിനിമകളിൽ തിരഞ്ഞെടുക്കുന്നതിൽ വാണി വലിയ ശ്രദ്ധ നൽകി.
മലയാളത്തിൽ വീണ്ടും സജീവമാകുകയാണ് വാണി വിശ്വനാഥിപ്പോൾ. ഒരു അന്വേഷണത്തിന്റെ തുടക്കം ആണ് വാണിയുടെ വരാനിരിക്കുന്ന സിനിമ. സിനിമാ രംഗത്ത് നിന്നും മാറി നിന്നതിനെക്കുറിച്ചും തിരിച്ച് വരവിനെക്കുറിച്ചും സംസാരിക്കുകയാണ് വാണി വിശ്വനാഥ്.
വീണ്ടും തിരക്ക് പിടിച്ച് സിനിമകൾ ചെയ്യണമെന്നില്ലെന്നും നല്ല കഥാപാത്രങ്ങൾ ചെയ്യണമെന്നും അതിലൂടെ തിരക്കാവുകയാണെങ്കിൽ ആകട്ടെ എന്നാണ് തനിക്കാഗ്രഹമെന്നും വാണി പറയുന്നു. സിനിമകളിൽ നിന്ന് മാറി നിന്ന കാലഘട്ടത്തെക്കുറിച്ചും വാണി സംസാരിച്ചു. മാറി നിന്ന സമയത്ത് സിനിമയെ മിസ് ചെയ്‌തിട്ടില്ല. കാരണം അതിലും സന്തോഷമുള്ള കാര്യത്തിൽ ഏർപ്പെടുമ്പോൾ അത് മിസ്സാവില്ല. ദുഖമുള്ള കാര്യത്തിൽ ഏർപ്പെടുമ്പോഴേ മിസ് ചെയ്യൂ. എന്റെ മക്കൾ എനിക്ക് സിനിമയേക്കാൾ കൂടുതൽ സന്തോഷം തന്നതാണെന്നും വാണി പറയുന്നു.
അതേസമയം കിംഗ് എന്ന സിനിമയിലിലെ ഡയലോഗിനെക്കുറിച്ചും വാണി വിശ്വനാഥ് സംസാരിച്ചു. രഞ്ജി പണിക്കർ എഴുതി ഷാജി കൈലാസ് സംവിധാനം ചെയ്ത പൊളിറ്റിക്കൽ ത്രില്ലർ ചിത്രമായിരുന്നു ദി കിങ്ങ്. 1995ൽ പുറത്തിറങ്ങിയ ഈ സിനിമയിൽ ജില്ലാ കളക്‌ടർ ജോസഫ് അലക്സ് ഐ.എ.എസ് ആയാണ് മമ്മൂട്ടി എത്തിയത്. കിങ്ങിൽ അസിസ്റ്റൻ്റ് കലക്‌ടർ അനുരാ മുഖർജി ഐ.എ.എസായി എത്തിയത് വാണി വിശ്വനാഥ് ആയിരുന്നു.
മമ്മൂക്കയെ അടിക്കാനായോങ്ങുമ്പോൾ ഇനി നിന്റെ കൈ ഒരാണിന് നേരെയും ഉയരരുതെന്ന അദ്ദേഹത്തിന്റെ ഡയലോഗുണ്ട്. പക്ഷെ ആ പടത്തിന് ശേഷമാണ് സിനിമയിൽ തന്റെ കൈ ഉയർന്നതെന്നും വാണി പറയുന്നു. തെലുങ്കിൽ വിജയശാന്തി മാം പൊലീസ് വേഷങ്ങൾ ചെയ്യുമ്പോൾ ഞാനവിടെ ഗ്ലാമർ വേഷങ്ങളാണവിടെ ചെയ്‌ത്‌ കൊണ്ടിരുന്നത്. ഇങ്ങനെ എനിക്കൊക്കെ ചെയ്യാൻ പറ്റുമോ എന്ന് അന്ന് തോന്നിയിട്ടുണ്ട്. പിന്നീട് മലയാളത്തിലേക്ക് വന്ന് തനിക്ക് അത്തരം കഥാപാത്രങ്ങൾ ലഭിച്ചെന്നും വാണി വിശ്വനാഥ് പറയുന്നു.
