കോഴിക്കോട് : മദ്രസ അധ്യാപക ക്ഷേമനിധി ബോര്‍ഡ് ചെയര്‍മാന്‍ സ്ഥാനത്ത് നിന്ന് കൊടുവളളിയിലെ മുന്‍ സിപിഎം സ്വതന്ത്ര എംഎല്‍എ കാരാട്ട് റസാഖിനെ ഒഴിവാക്കാന്‍ സാധ്യത. രാജി വെക്കാന്‍ നിര്‍ദ്ദേശം നല്‍കിയെന്നാണ് സൂചന. എന്നാല്‍ തന്നോട് രാജിവെക്കാന്‍ ആരും പറഞ്ഞിട്ടില്ലെന്നും ആവശ്യമെങ്കില്‍ അവര്‍ക്ക് തന്നെ സ്ഥാനത്ത് നിന്നും നീക്കം ചെയ്യാമെന്നുമാണ് കാരാട്ട് റസാക്ക് പറഞ്ഞത്.
കാരാട്ട് റസാക്ക് വീണ്ടും പിവി അന്‍വറുമായി കൂടിക്കാഴ്ച നടത്തിയ സാഹചര്യത്തിലാണ് നീക്കം. സി പി എമ്മുമായി ഇടഞ്ഞ് ഡി എം കെ രൂപീകരിച്ച അന്‍വറുമായി കഴിഞ്ഞ ദിവസം കാരാട്ട് റസാഖ് കൂടിക്കാഴ്ച നടത്തിയിരുന്നു. ഉപതെരഞ്ഞെടുപ്പ് നടക്കുന്ന ചേലക്കരയിലെത്തിയാണ് റസാഖ് അന്‍വറിനെ കണ്ടത്.
അന്‍വര്‍ പറയുന്ന രാഷ്‌ട്രീയം മനസിലാക്കാനാണ് താന്‍ ചേലക്കരയിലെത്തിയതെന്നാണ് റസാഖ് കൂടിക്കാഴ്ചയെ കുറിച്ച് നല്‍കിയ വിശദീകരണം. ഇപ്പോഴും താന്‍ ഇടതുമുന്നണിയുടെ ഭാഗമാണെന്നും പഠിച്ചതിന് ശേഷം അന്‍വറിന് പിന്തുണ നല്‍കുന്നതില്‍ തീരുമാനം എടുക്കുമെന്നും റസാഖ് പറഞ്ഞു.
നേരത്തേ അന്‍വര്‍ എഡിജിപി എംആര്‍ അജിത് കുമാറിനെതിരെയും പി ശശിക്കെതിരെയും രംഗത്തെത്തിയ വേളയില്‍ കാരാട്ട് റസാഖും പിന്തുണ നല്‍കിയിരുന്നു. പി ശശിക്കെതിരെയാണ് കാരാട്ട് റസാഖ് ആരോപണമുന്നയിച്ചത്. അന്‍വര്‍ മുന്നണി വിട്ടെങ്കിലും റസാഖ് നിലപാട് പ്രഖ്യാപിച്ചിട്ടില്ല.
