പത്തനംതിട്ട: പൊതുവിതരണ വകുപ്പ് വിജിലന്സ് സംഘം നടത്തിയ പരിശോധനയില് കോന്നി ഗോഡൗണില് നിന്ന് 800 ക്വിന്റല് അരി കാണാതായതായി സ്ഥിരീകരിച്ചു. പച്ചരിയും പുഴുക്കലരിയും ആണ് കാണാതായത് . താലൂക്ക് സപ്ലൈ ഓഫീസര്ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന നടത്തിയത്. കഴിഞ്ഞ ദിവസം ലോറിയില് അരി കടത്തി എന്നായിരുന്നു വിവരം ലഭിച്ചത്. വിജിലന്സ് ഓഫീസര് ജ്യോതിലക്ഷ്മിയുടെ നേതൃത്വത്തില് മൈലപ്ര ഡിപ്പോയുടെ പരിധിയില് പ്രവര്ത്തിക്കുന്ന ആനക്കൂട് ഭാഗം, പൂവന്പാറ എന്നിവിടങ്ങളിലെ ഗോഡൗണുകളിലാണ് പരിശോധന നടത്തിയത്. റേഷന് കടകളിലേക്കുള്ള വിതരണത്തിലാണ് ഇവിടെ അരി സംഭരിക്കുന്നത് .
