ലക്നൗ : ഉത്തർപ്രദേശിലെ അംറോഹയിൽ സ്കൂൾ ബസിനുനേരെ അക്രമികൾ വെടിയുതിർത്തു. ഡ്രൈവർ ബസ് നേരെ അടുത്തുള്ള പോലീസ് സ്റ്റേഷനിലേക്ക് ഓടിച്ചു കയറ്റിയതിനാൽ കൂടുതൽ ആക്രമണം ഒഴിവായി .
രാവിലെ 7.30ഓടെ എസ്ആർഎസ് സ്‌കൂളിലെ മിനി ബസ് വിദ്യാർത്ഥികളെ കയറ്റി പോകുമ്പോഴായിരുന്നു സംഭവം. ബസിൽ നിരവധി കുട്ടികളുമുണ്ടായിരുന്നു . ബസിനെ പിന്തുടർന്ന് ബൈക്കിലെത്തിയ മൂന്ന് പേർ പെട്ടെന്ന് വെടിയുതിർക്കുകയായിരുന്നു. വെടിയൊച്ച കേട്ടതോടെ ബസിൽ ഇരുന്ന കുട്ടികൾ ഭയന്ന് കരയാനും നിലവിളിക്കാനും തുടങ്ങി. കുട്ടികളുടെ ജീവൻ അപകടത്തിലാണെന്ന് മനസ്സിലാക്കിയ ഡ്രൈവർ ജീവൻ പണയം വച്ച് ബസ് അടുത്തുള്ള പോലീസ് സ്റ്റേഷനിലേക്ക് എത്തിക്കുകയായിരുന്നു . തുടർന്നാണ് അക്രമികൾ സ്ഥലം വിട്ടത്.
ബിജെപി നേതാവും ബ്ലോക്ക് മേധാവിയുമായ വീരേന്ദ്ര സിങ്ങിന്റെതാണ് സ്കൂൾ. സംഭവം പ്രദേശത്ത് ഭീതി പടർത്തി . പോലീസ് അന്വേഷണം ആരംഭിച്ചു.
